Падзеі, факты, анонсы

15 ліпеня, Мінск /Кар. БЕЛТА/. Амаль 150 распрацовак прадставіць Беларусь на міжнароднай выстаўцы Techno-Frontier 2013, якая пройдзе з 17 па 19 ліпеня ў Токіа. Аб гэтым паведаміў карэспандэнту БЕЛТА памочнік старшыні Дзяржаўнага камітэта па навуцы і тэхналогіях Юрый Лукашэвіч.

Беларуская дэлегацыя на чале з намеснікам старшыні Дзяржаўнага камітэта па навуцы і тэхналогіях Анатолем Сільчанкам знаходзіцца з 15 па 20 ліпеня 2013 года з візітам у Японіі. У склад дэлегацыі ўваходзяць таксама прадстаўнікі Міністэрства адукацыі, Нацыянальнай акадэміі навук, Міністэрства прамысловасці, Дзяржаўнага ваенна-прамысловага камітэта і прыватных навукова-вытворчых кампаній. Мэтай візіту з'яўляецца ўдзел у міжнароднай выстаўцы электронікі, мехатронікі і спадарожных галін Techno-Frontier 2013.

Нацыянальная выстаўка навукова-тэхнічных дасягненняў Беларусі пройдзе ў Такійскім выставачным комплексе. Айчынныя распрацоўшчыкі прадэманструюць гасцям і ўдзельнікам выстаўкі каля 150 экспанатаў па наступных тэматычных раздзелах: мехатроніка, электроніка, зялёная энергетыка і энергазберажэнне, сумежныя галіны.

Techno-Frontier уяўляе шырокамаштабны праект, які аб'ядноўвае 11 спецыялізаваных прамысловых выставак па розных раздзелах: ад мехатронікі і электронікі да тэрмальнай інжынерыі і тэхналогій зандзіравання. У мінулым годзе ў выстаўцы прынялі ўдзел больш як 450 кампаній. У 2013 годзе плануецца ўдзел больш як 500 кампаній. Выставачная плошча складзе больш як 25 тыс.кв.м.-0-