Падзеі, факты, анонсы

9 мая, Лісабон /Кар. БЕЛТА/. Беларусь не ўвайшла ў фінал конкурсу "Еўрабачанне-2018" па выніках першага паўфіналу, перадае карэспандэнт БЕЛТА.

Першая дзясятка фіналістаў вызначылася ў сталіцы Партугаліі Лісабоне, які прымае самае маштабнае музычнае шоу Еўропы. У дзясятку ўвашлі Аўстрыя, Эстонія, Кіпр, Літва, Ізраіль, Чэхія, Балгарыя, Албанія, Фінляндыя, Ірландыя.

Прадстаўнік Беларусі ALEKSEEV, які выканаў песню "Forever", не ўвайшоў у лік уладальнікаў пуцёўкі ў фінал конкурсу 12 мая. За сімпатыі еўрапейскай публікі змагаліся 19 краін. У першым паўфінале маглі галасаваць краіны-ўдзельніцы, а таксама Партугалія, Іспанія і Вялікабрытанія. Інфармацыя аб тым, як прагаласавалі краіны, будзе адкрыта пасля фіналу. Другая дзясятка фіналістаў стане вядома 10 мая.

Аўтаматычна трапляюць у фінал прадстаўнікі арганізатараў конкурсу - краін Вялікай пяцёркі - Германіі, Францыі, Італіі, Іспаніі і Вялікабрытаніі, а таксама гаспадыні цяперашняга "Еўрабачання" Партугаліі. Такім чынам, у фінале за сімвал конкурсу - хрустальны мікрафон будуць спаборнічаць 26 артыстаў.

У 63-м конкурсе "Еўрабачанне" ўдзельнічаюць 43 краіны. Партугалія праводзіць песенны форум упершыню. Права прыняць конкурс краіна атрымала дзякуючы перамозе Сальвадора Сабрала з песняй "Amar pelos dois" ("Кахаць за дваіх") на партугальскай мове на "Еўрабачанні" ў Кіеве ў 2017 годзе. Сальвадор Сабрал атрымаў рэкордную колькасць балаў за ўсю гісторыю конкурсу - 758.