12 снежня, Мінск /Кар. БЕЛТА/. Балет "Шчаўкунок" прадставілі для французскіх гледачоў юныя танцоўшчыкі з Беларусі, паведамілі БЕЛТА ў пасольстве Беларусі ў Францыі.
Выхаванцы Балетнай школы Марыны Вежнавец выступілі ў праграме I Беларускіх тэатральных сезонаў у Францыі ў Клермон-Феране і Ліёне. Выступленні дзіцячага балета, заснавальніцай школы якога з'яўляецца прыма-балерына Нацыянальнага акадэмічнага Вялікага тэатра оперы і балета Беларусі Марына Вежнавец, былі прыняты з вялікай цікавасцю, спектаклі прайшлі пры аншлагах, артыстаў не раз выклікалі на біс.
Французскія гледачы ўбачылі балетны спектакль "Шчаўкунок" на музыку знакамітага рускага кампазітара Пятра Чайкоўскага. Больш за 40 артыстаў, сярод якіх дзеці ад 5 да 13 гадоў, на высокім творчым узроўні прадставілі беларускае харэаграфічнае мастацтва. Харэографы і юныя артысты таксама далі некалькі майстар-класаў для навучэнцаў кансерваторыі Клермон-Ферана.
Арганізатарам выступленняў з'яўляецца пасольства Беларусі ў Францыі пры ўдзеле мэрыі і оперы Клермон-Ферана, асацыяцыі BelArt (Ліён). Фінансавая падтрымка была аказана Міністэрствам замежных спраў Беларусі, беларускай кампаніяй "Домабудаванне" (Шклоў), французскай кампаніяй Logibat (Метц).