5 сакавіка, Мінскі раён /Кар. БЕЛТА/. Прэзідэнт Беларусі Аляксандр Лукашэнка 4 сакавіка прыняў удзел у біятлонным забегу разам з вядомымі алімпійцамі краіны. Мерапрыемства адбылося ў Рэспубліканскім цэнтры алімпійскай падрыхтоўкі па зімовых відах спорту "Раўбічы", перадае карэспандэнт БЕЛТА.
Разам з кіраўніком дзяржавы на лыжную трасу выйшлі яго малодшы сын Мікалай, прэс-сакратар Прэзідэнта Наталля Эйсмант, пераможцы і прызёры Алімпійскіх гульняў Дар'я Домрачава, Ірына Крыўко, Дзінара Алімбекава, Аляксей Айдараў і Ксенія Санковіч.
4 сакавіка ў Раўбічах таксама завяршыўся фінальны этап рэспубліканскіх спаборніцтваў сярод дзяцей і падлеткаў па біятлоне "Снежны снайпер". Пераможцы былі вызначаны ў трох узроставых катэгорыях. У турніры прынялі ўдзел юныя біятланісты з усіх рэгіёнаў Беларусі - усяго 168 хлопчыкаў і дзяўчынак.
Сярод прызёраў спаборніцтваў быў і малодшы сын Прэзідэнта Мікалай Лукашэнка, які выступаў у сярэдняй узроставай групе і заняў трэцяе месца ў спрынце, а таксама заваяваў серабро ў змешанай эстафеце ў складзе каманды Мінскай вобласці.-0-