30 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка накіраваўся з рабочым візітам у Расійскую Федэрацыю, паведамляе БЕЛТА.
Кіраўнік беларускай дзяржавы разам з Прэзідэнтам Расіі Уладзімірам Пуціным прыме ўдзел у адкрыцці Ржэўскага мемарыяла савецкаму салдату.
Мемарыяльны комплекс узведзены ля вёскі Харошава Ржэўскага раёна Цвярской вобласці паблізу федэральнай аўтамабільнай трасы М9 Масква - Рыга. Ён створаны на народныя ахвяраванні па ініцыятыве ветэранаў Вялікай Айчыннай вайны. Праект рэалізаваны Расійскім ваенна-гістарычным таварыствам пры падтрымцы Саюзнай дзяржавы, Мінкультуры Расіі і ўрада Цвярской вобласці. Мемарыял прысвечаны памяці савецкіх салдат, якія загінулі ў баях пада Ржэвам у 1942-1943 гадах.
Цэнтральным аб'ектам комплексу з'яўляецца 25-метровая скульптура салдата на 10-метровым насыпным кургане.
У комплекс уваходзіць музейна-гістарычны павільён. Музей аснашчаны мультымедыйным абсталяваннем, з дапамогай якога наведвальнікі могуць азнаёміцца з фатаграфіямі, франтавымі пісьмамі, апавяданнямі, успамінамі ўдзельнікаў Ржэўскай бітвы.
Як паведамлялася БЕЛТА, аб планах пабываць на адкрыцці мемарыяла Аляксандр Лукашэнка заявіў 26 чэрвеня ў Салігорску. Раней наведаць гэта мерапрыемства яго запрасіў Уладзімір Пуцін. "Мы выбіраем час, як паехаць. Шукаем момант, каб паехаць і абмеркаваць (з Прэзідэнтам Расіі. - Заўвага БЕЛТА) там жа некаторыя пытанні нашага далейшага супрацоўніцтва", - сказаў кіраўнік дзяржавы.