26 мая, Мінск /Кар. БЕЛТА/. ЧС-2014 па хакеі ў Мінску стаў буйнейшым нацыянальным праектам. Такую думку выказаў сёння міністр унутраных спраў Беларусі Ігар Шуневіч, узнагароджваючы супрацоўнікаў міліцыі і ваеннаслужачых унутраных войскаў (УВ), якія вызначыліся пры ахове грамадскага парадку і забеспячэнні дарожнай бяспекі ў час чэмпіянату, паведамілі БЕЛТА ва ўпраўленні інфармацыі і грамадскіх сувязей МУС.
Узнагароджанне адбылося ў сталічнай вайсковай часці 5448 УВ МУС. Выступаючы перад прысутнымі, міністр сказаў: "Упершыню такое буйнамаштабнае спартыўнае мерапрыемства было даверана нашай дзяржаве. Чэмпіянат стаў буйнейшым нацыянальным праектам, у якім актыўна ўдзельнічала ўся краіна, у тым ліку і мы. Супрацоўнікі органаў унутраных спраў і ваеннаслужачыя ўнутраных войскаў МУС унеслі вялікі ўклад у тое, каб планетарнае хакейнае першынство ў Мінску пабіла рэкорды па наведвальнасці трыбун, а ў яго ўдзельнікаў і гасцей засталіся аб Беларусі толькі добрыя, яркія і цёплыя ўспаміны".
Кіраўнік міліцэйскага ведамства падзякаваў міліцыянерам, у тым ліку прыехаўшым з іншых рэгіёнаў рэспублікі для аказання дапамогі сталічным калегам, за добрасумленнае выкананне службовых абавязкаў на аб'ектах правядзення чэмпіянату. Ён адзначыў, што і супрацоўнікі АМАП, і міліцыянеры патрульна-паставой службы, і інспектары ДАІ, і іншыя праявілі высокі прафесіяналізм, вытрымку, пільнасць, а таксама ветлівасць і гасціннасць.
Міністр выказаў упэўненасць, што атрыманы вопыт пры неабходнасці будзе паспяхова прымяняцца на рэгіянальным узроўні.
Акрамя таго, словы ўдзячнасці былі адрасаваны родным і блізкім праваахоўнікаў, якія праявілі ўвагу, чуласць і падтрымку ў час службы.
Пн | Аўт | Сер | Чцв | Пт | Сб | Нядз |
---|