21 жніўня, Мінск /Святлана Саўко - БЕЛТА/. Замежныя вытворцы прадуктаў харчавання звяртаюцца да Беларусі наконт арганізацыі сумеснай перапрацоўкі прадукцыі пасля ўвядзення расійскіх санкцый. Аб гэтым паведаміў сёння журналістам дырэктар дэпартамента знешнеэканамічнай дзейнасці МЗС Беларусі Ігар Назарук, перадае карэспандэнт БЕЛТА.
"З 7 жніўня звароты ў адрас Беларусі, тых ці іншых дзяржаўных органаў былі", - сказаў прадстаўнік МЗС. Беларускі бок пастаянна прапрацоўвае такія кааперацыйныя праекты. "Мы паспяхова супрацоўнічаем з італьянскімі, германскімі, дацкімі кампаніямі, якія спецыялізуюцца на выпуску жывёлагадоўчай прадукцыі. У нас добрыя вынікі ў гэтай галіне. Працэс у пастаяннай прапрацоўцы", - адзначыў ён.
Урад РФ увёў 7 жніўня 2014 года поўную забарону на пастаўкі ялавічыны, свініны, мяса птушкі, рыбы, сыроў, малака і плодаагародніннай прадукцыі з Аўстраліі, Канады, ЕС, ЗША і Нарвегіі тэрмінам на адзін год. З гэтага спіса 20 жніўня былі выключаны малькі, безлактознае малако і безлактозная малочная прадукцыя, насенная бульба, цукровая кукуруза, гарох, БАДы і вітаміны.
Беларускі і расійскі бакі дамовіліся, што Беларусь зможа пастаўляць у Расію перапрацаваную прадукцыю з еўрапейскай сыравіны.
Пн | Аўт | Сер | Чцв | Пт | Сб | Нядз |
---|