Бізнес-навіны

9 красавіка, Мінск /Кар. БЕЛТА/. Правядзенне беларуска-казахстанскага бізнес-форуму з'яўляецца стабільным курсам на ўмацаванне інтэграцыі. Такое меркаванне выказаў 9 красавіка журналістам у Мінску напярэдадні адкрыцця форуму першы намеснік старшыні Беларускай гандлёва-прамысловай палаты Вячаслаў Рэўт, перадае карэспандэнт БЕЛТА.

"Гэта мерапрыемства - не разавы праект, гэта стабільны курс на ўмацаванне інтэграцыі і нашага супрацоўніцтва", - адзначыў Вячаслаў Рэўт, растлумачыўшы, што БелГПП і Карагандзінская вобласць супрацоўнічаюць даўно. "Мы сёння праводзім форум тут, а наша дэлегацыя збіраецца ў Казахстан для ўдзелу ў машынабудаўнічай выстаўцы, якая адбудзецца 15-18 красавіка. Гэта сведчыць аб цесных наладжаных кантактах", - упэўнены першы намеснік кіраўніка БелГПП.

Вячаслаў Рэўт звярнуў увагу на тое, што Карагандзінская вобласць мае інтарэс для Беларусі з пункту гледжання паставак пшаніцы з улікам таго, што з'яўляецца паўднёвым рэгіёнам. "Там расце высакакласнае збожжа, якое выкарыстоўваецца ў вытворчасці асобных відаў хлебабулачных вырабаў, але не сакрэт, што ў большай ступені нас цікавіць пастаўка нашай тэхнікі ў Казахстан", - прызнаў першы намеснік старшыні. Традыцыйна Казахстан з'яўляецца спажыўцом прамысловай прадукцыі і, у прыватнасці, аўтатрактарнай тэхнікі. "Мы хацелі б падтрымаць гэту традыцыю і знайсці зацікаўленасць у арганізацыі зборачных вытворчасцей у Казахстане, каб зменшыць транспартны складальнік", - падкрэсліў Вячаслаў Рэўт.

Візіт у Беларусь дэлегацыі Карагандзінскай вобласці праходзіць 9-10 красавіка. Узначальвае казахстанскі бок акім адпаведнай вобласці Баўржан Абдзішаў. Праграма візіту ў тым ліку прадугледжвае бізнес-форум, які арганізаваны БелГПП і Гандлёва-прамысловай палатай Карагандзінскай вобласці з удзелам дзелавых колаў. Таксама адбудзецца кантактна-кааперацыйная біржа.

У час візіту запланаваны дзелавыя перагаворы паміж кампаніямі. Беларускія прадпрыемствы будуць мець магчымасць правесці двухбаковыя перагаворы па пытаннях інвесціравання сумесных праектаў, па супрацоўніцтву ў галіне энергетыкі і цепласетак, вытворчасці помпавых станцый водазабеспячэння і каналізацыі, швейных вырабаў, абутку спецыяльнага прызначэння, кісламалочнай прадукцыі. Прадстаўнікі карагандзінскіх кампаній зацікаўлены ў пошуку партнёраў для рэалізацыі сумесных праектаў, новых рынкаў збыту, вывучэнні магчымасцей інвесціравання ў рэгіён.

Тавараабарот Карагандзінскай вобласці з Беларуссю ў мінулым годзе склаў $122,9 млн. і павялічыўся на 73,8 працэнта ў параўнанні з 2011 годам. Асноўныя пазіцыі беларускага экспарту - вагоны, малочная прадукцыя, маторныя транспартныя сродкі, шыны, мэбля і лякарствы. Імпарт з Карагандзінскай вобласці ўключаў у сябе пастаўкі вырабаў з чорных металаў і канвеерных стужак.