Бізнес-навіны

11 красавіка, Мінск /Кар. БЕЛТА/. Міжнароднае рэйтынгавае агенцтва Standard & Poor's пацвердзіла доўгатэрміновыя і кароткатэрміновыя суверэнныя крэдытныя рэйтынгі Беларусі на ўзроўні "B-/В", прагноз змянення рэйтынгаў - "стабільны", паведамілі БЕЛТА ў агенцтве.

"Мы чакаем, што абавязацельствы ўрада Беларусі па абслугоўванні і пагашэнні знешняга доўгу будуць прафінансаваны з розных крыніц, уключаючы даходы ад прыватызацыі і прыцягнення пазыковых абавязацельстваў. Мы таксама лічым, што аб'ём фінансавай падтрымкі з боку Расіі ўзрасце, калі іншых крыніц фінансавання будзе недастаткова", - абгрунтоўвае сваё рашэнне S&P.

У паведамленні ўдакладняецца: "Прагноз "стабільны" па рэйтынгах рэспублікі адлюстроўвае чаканні таго, што, нягледзячы на слабыя паказчыкі знешняй ліквіднасці і недастатковую гібкасць грашова-крэдытнай палітыкі, урад Беларусі, напэўна, будзе прытрымлівацца існуючага плана рэфінансавання падатковых абавязацельстваў на 2014-2015 гады і ў выпадку неабходнасці атрымае своечасовую падтрымку з боку Расіі".

Агенцтва Standard & Poor's можа павысіць рэйтынгі ў выпадку паляпшэння паказчыкаў знешняга балансу, што будзе выяўляцца ў зніжэнні патрэб у знешнім фінансаванні, паляпшэнні сальда рахунку бягучых аперацый і большай даступнасці замежнай валюты. "У гэтым сэнсе палітыка, якая прывядзе да павышэння канкурэнтаздольнасці эканомікі краіны, і/або значны пазітыўны эфект ад Мытнага саюза з Расіяй могуць стаць фактарамі, якія садзейнічаюць павышэнню рэйтынгаў", - гаворыцца ў паведамленні.