Бізнес-навіны

21 сакавіка, Сінгапур /Таццяна Паляжай - БЕЛТА/. Сінгапур выказаў намер удзельнічаць у Беларуска-кітайскім індустрыяльным парку. Аб гэтым паведаміў сёння карэспандэнту БЕЛТА міністр эканомікі Беларусі Мікалай Снапкоў пасля завяршэння яго сустрэчы з міністрам гандлю і прамысловасці Сінгапура Лім Хнг Кіянгам.

Мікалай Снапкоў адзначыў, што 22 сакавіка ў рамках беларуска-сінгапурскага бізнес-форуму адбудзецца падпісанне пагаднення з кампаніяй JTC аб іх удзеле ў Беларуска-кітайскім індустрыяльным парку. Ён таксама дадаў, што міністр гандлю і прамысловасці Сінгапура Лім Хнг Кіянг адобрыў і падтрымаў гэту ідэю.

Фармат удзелу сінгапурскага боку яшчэ абмяркоўваецца. Паводле слоў Мікалая Снапкова, "гэта можа быць або ўдзел у кіраванні акцыянерным капіталам кіруючай кампаніі, або інвесціраванне ў інфраструктуру, гэта значыць як сумесны бізнес кіруючай кампаніі, або прыцягненне інвестара з Сінгапура на тэрыторыю Беларуска-кітайскага індустрыяльнага парку".