Бізнес-навіны

Расійская кампанія "Мечэл" зацікаўлена ў супрацоўніцтве з БМЗ і БелАЗам

16 жніўня, Мінск /Вольга Бяляўская - БЕЛТА/. Расійская кампанія "Мечэл" зацікаўлена ў супрацоўніцтве з БМЗ і БелАЗам. Аб гэтым заявіў сёння на сустрэчы з прэм'ер-міністрам Беларусі Міхаілам Мясніковічам старшыня савета дырэктараў ААТ "Мечэл" Ігар Зюзін, перадае карэспандэнт БЕЛТА.

"У нас ёсць інтарэс да Беларусі, да прамысловасці краіны", - падкрэсліў Ігар Зюзін. Ён адзначыў, што цяпер кампанія "Мечэл" працуе ў многіх краінах як постсавецкай прасторы, так і Еўропы, Амерыкі і таксама зацікаўлена ў выхадзе на беларускі рынак. Кампанія з улікам дамоўленасцей, дасягнутых на пасяджэнні Саўміна Саюзнай дзяржавы, гатова адной з першых рэалізаваць намечаныя праекты з палітычных рэалій і галіны дамоўленасцей у практычнай эканамічнай сферы, сказаў старшыня савета дырэктараў ААТ "Мечэл".

Ён звярнуў асаблівую ўвагу на тое, што кампанія з'яўляецца буйным патэнцыяльным партнёрам Беларусі і беларускіх прадпрыемстваў. "У нас доўгатэрміновыя адносіны, і мы хацелі б перавесці іх у плоскасць з узаемнымі інвестыцыямі і стварэннем сумесных кампаній", - сказаў Ігар Зюзін. У прыватнасці, у кампаніі цесныя адносіны з БелАЗам, яна выступае адным з буйнейшых спажыўцоў кар'ернай тэхнікі беларускай вытворчасці. Цяпер расійская кампанія запускае новы праект у Якуціі, у сувязі з чым зацікаўлена ў пашырэнні супрацоўніцтва з БелАЗам.

Акрамя таго, ААТ "Мечэл" гатова развіваць партнёрства з Беларускім металургічным заводам. "Гэта цікавае для нас прадпрыемства, мы з ім можам дабіцца сінергетычнага эфекту, паколькі з'яўляемся адным з буйнейшых вытворцаў будаўнічай прадукцыі ў Расіі і Усходняй Еўропе, - сказаў Ігар Зюзін. Тут можна было б зрабіць аптымізацыю паставак металапрадукцыі".

Старшыня савета дырэктараў ААТ "Мечэл" выказаў упэўненасць у паспяховасці рэалізацыі сумесных з БМЗ праектаў. "Лічу, што мы маглі б разам з БМЗ зрабіць вельмі добрыя праекты, - падкрэсліў ён. - Па вытворчасці сталі ў бягучым годзе мы выйдзем прыкладна на 10 млн.т, і калі нам удалося б перакінуць арбіту на БМЗ, то гэта было б цікава і для нас, і для завода".

ААТ "Мечэл" - адна з вядучых расійскіх кампаній у горназдабыўной і металургічнай галінах. Яе бізнес складаецца з чатырох сегментаў: горназдабыўнога, металургічнага, ферасплаўнага і энергетычнага. У кампанію ўваходзяць вытворчыя прадпрыемствы ў 13 рэгіёнах Расіі, а таксама ў ЗША, Казахстане, Румыніі, Літве і Балгарыі. Усяго "Мечэл" аб'ядноўвае каля 30 прампрадпрыемстваў. Гэта вытворца вугалю, жалезаруднага канцэнтрату, сталі, пракату і г.д. У склад холдынга ўваходзяць таксама тры гандлёвыя парты, уласны транспартны аператар, міжнародныя збытавыя і сэрвісныя сеткі.

"Мечэл" знаходзіцца на шостым месцы сярод вядучых сусветных вытворцаў канцэнтрату каксавальнага вугалю, займае першае месца ў Расіі па вытворчасці канцэнтрату каксавальнага вугалю і трэцяе месца ў Расіі па агульнай здабычы вугалю. Па выніках фінансавай дзейнасці за 2010 год выручка "Мечэл" перавысіла $9 млрд., чысты прыбытак склаў $657,2 млн.

версія для друку

зрабіць стартавай

дабавіць у выбранае