16 лютага, Мінск /Таццяна Чумакова - БЕЛТА/. Беларускі Парк высокіх тэхналогій разлічвае на лібералізацыю рынку сувязі ў рэспубліцы пасля ўступлення ў сілу ўказа аб рэгуляванні Інтэрнэту. Аб гэтым заявіў сёння журналістам дырэктар адміністрацыі ПВТ Валерый Цапкала, перадае карэспандэнт БЕЛТА.
"Мы зацікаўлены ў лібералізацыі рынку інтэрнэт-паслуг і міжнароднай тэлефаніі і чакаем, што пасля ўступлення ў сілу ўказа аб рэгуляванні Інтэрнэту гэта адбудзецца", - сказаў ён.
Паводле яго слоў, адміністрацыя ПВТ вяла перагаворы аб магчымасці рэзідэнтамі Парку высокіх тэхналогій атрымаць права на пропуск міжнароднага інтэрнэт-трафіку і на ўзаемадзеянне з міжнароднымі аператарамі. "Мы выказвалі зацікаўленасць у стварэнні незалежнага аператара знешняга інтэрнэт-шлюза, але гэта не адзіная магчымасць для нашых рэзідэнтаў у арганізацыі незалежнага Інтэрнэту, таму прапрацоўваем і іншыя варыянты", - адзначыў Валерый Цапкала.
Указ нумар 60 "Аб мерах па ўдасканаленню выкарыстання нацыянальнага сегмента сеткі Інтэрнэт" падпісаны Прэзідэнтам 1 лютага. Дакумент накіраваны на абарону інтарэсаў грамадзян, грамадства і дзяржавы ў інфармацыйнай сферы, павышэнне якасці і патанненне інтэрнэт-паслуг, забеспячэнне далейшага развіцця нацыянальнага сегмента сеткі Інтэрнэт. Указ уступае ў сілу з 1 ліпеня 2010 года.-0-
Пн | Аўт | Сер | Чцв | Пт | Сб | Нядз |
---|