Бізнес-навіны

Пастаўкі беларускіх самазвалаў у ПАР будуць павялічаны

4 сакавіка, Мінск /Аліна Грышкевіч - БЕЛТА/. Пастаўкі беларускіх самазвалаў для работы ў паўднёваафрыканскіх здабыўных кар'ерах будуць павялічаны. Такая дамоўленасць дасягнута па выніках праведзенага з 27 лютага па 2 сакавіка візіту дэлегацыі беларускіх дзелавых колаў у Паўднёва-Афрыканскую Рэспубліку, паведамілі БЕЛТА ў прэс-службе МЗС.

Візіт быў арганізаваны пасольствам Беларусі ў ПАР. У складзе дэлегацыі былі прадстаўнікі кіраўніцтва ААТ "Прамагралізінг", ААТ "Беларуская ўніверсальная таварная біржа" (БУТБ) і ТАА "Дызель Камплект". У ходзе праведзеных сустрэч дасягнуты дамоўленасці аб дадатковых пастаўках беларускіх самазвалаў у ПАР.

На перагаворах у Міністэрстве гандлю і прамысловасці ПАР паўднёваафрыканскі бок выказаў зацікаўленасць у сумеснай рабоце па вытворчасці і пашырэнню выкарыстання ў рэгіёне беларускай дарожна-будаўнічай і іншай спецыяльнай тэхнікі.

Саветам паўднёваафрыканскіх прадпрымальнікаў праяўлена цікавасць да ўмацавання супрацоўніцтва з "Прамагралізінгам" і БУТБ, у тым ліку па пошуку найбольш аптымальных механізмаў аплаты за пастаўляемую беларускую прадукцыю.

Абмеркаваны таксама перспектывы супрацоўніцтва ААТ "Прамагралізінг" з паўднёваафрыканскай фінансавай структурай Citizen Finance, якая мае значны вопыт у сферы лізінгавых аперацый у ПАР, краінах Поўдня Афрыкі і гатова выступіць партнёрам беларускага боку ў гэтай галіне, у тым ліку па папярэдняму адбору патэнцыяльных кліентаў, якія прэтэндуюць на атрыманне беларускай тэхнікі ў лізінг.

На сустрэчы з кіраўніцтвам Africa Union Holdings разгледжаны пытанні ўзаемадзеяння па інфармацыйнаму напаўненню рэгіянальнай электроннай гандлёвай пляцоўкі, якая функцыянуе на базе гэтай кампаніі.

версія для друку

зрабіць стартавай

дабавіць у выбранае