Бізнес-навіны

Новы самалёт "Белавія" Embraer-175 вылецеў у першы рэйс на Амстэрдам

21 верасня, Мінск /Таццяна Іванюк - БЕЛТА/. Новы самалёт кампаніі "Белавія" Embraer-175 вылецеў сёння ў першы рэйс па маршруце Мінск - Амстэрдам - Мінск. Аб гэтым карэспандэнту БЕЛТА паведамілі ў прэс-службе РУП "Нацыянальная авіякампанія "Белавія".

"Вылет з'яўляецца значным, таму што гэта пачатковы камерцыйны рэйс для Embraer-175 - першага паветранага судна для "Белавія", пастаўленага непасрэдна з завода-вытворцы", - адзначылі спецыялісты.

У авіякампаніі пракаменціравалі, што выбар напрамку залежаў не толькі ад паказчыкаў загрузкі. Так, Галандыя стала першай краінай, якая дала магчымасць беларускай авіякампаніі выканаць палёт. Ужо на наступным тыдні плануецца пачаць эксплуатацыю новага самалёта па некалькіх напрамках.

Прэзентацыя самалёта Embraer-175 "Белавія" адбылася 17 верасня. Новы самалёт - 19-ы па ліку ў флоце авіякампаніі. Пастаўка чарговага самалёта Embraer-175 чакаецца ў пачатку кастрычніка бягучага года. На працягу 2013 года плануецца далейшае пашырэнне і абнаўленне флоту авіякампаніі. Цяпер флот беларускага авіяперавозчыка складаецца з шасці самалётаў Boeing 737-500, пяці Boeing 737-300, чатырох CRJ-100/200, аднаго Embraer-175 і трох Ту-154М.

Спецыялісты прэс-службы таксама паведамілі, што з 28 кастрычніка "Белавія" пачне выконваць палёты па раскладу зімовага сезона, які прадугледжвае, у прыватнасці, скарачэнне частотнасці рэйсаў. Гэта звязана са змяншэннем сезоннага пасажырапатоку. Новым у зімовым сезоне 2012 года стане запланаванае на 26 снежня адкрыццё рэйса ў Барселону (Іспанія).

Нацыянальная авіякампанія "Белавія", створаная ў 1996 годзе, з'яўляецца буйнейшым авіяперавозчыкам у Беларусі. Базіруецца ў Нацыянальным аэрапорце Мінск. Ажыццяўляе рэгулярныя рэйсы з Мінска, Гомеля і Гродна па 42 напрамках у 24 краіны Еўропы і Азіі. З 1997 года - правадзейны член Міжнароднай асацыяцыі паветранага транспарту (IATA), з 2010 года ўваходзіць у Асацыяцыю еўрапейскіх рэгіянальных авіякампаній (ERAA). "Белавія" адпавядае вышэйшым міжнародным стандартам забеспячэння бяспекі. Па выніках аўдыту аперацыйнай бяспекі Міжнароднай асацыяцыі паветранага транспарту (IOSA - IATA Operational Safety Audit)  авіякампанія ў 2008 годзе ўвайшла ў рэгістр аператараў IOSA.

версія для друку

зрабіць стартавай

дабавіць у выбранае