3 красавіка, Мінск /Вольга Бяляўская - БЕЛТА/. На будаўніцтва ў Беларусі кампаніяй "Славкалій" новага калійнага камбіната плануецца накіраваць $1,5 млрд. Аб гэтым паведаміў журналістам уладальнік кампаніі, вядомы расійскі бізнесмен Міхаіл Гуцарыеў, які 3 красавіка прыняў удзел у нарадзе па пытаннях рэалізацыі праекта, праведзенай у беларускім урадзе пад старшынствам прэм'ер-міністра Міхаіла Мясніковіча, перадае карэспандэнт БЕЛТА.
"Мы знаходзімся на першым этапе праекта - створана кампанія ("Славкалій". - Заўвага БЕЛТА), атрыманы горныя адводы, набраны штат, зацверджаны бюджэт, заключаны дагавор на праектаванне, - расказаў Міхаіл Гуцарыеў. - Патрачана ўжо некалькі дзясяткаў мільёнаў долараў, да канца года будзе зрасходавана да $100 млн.". У цэлым інвестыцыі ў праекты ацэньваюцца ў памеры $1,5 млрд.
Праектныя работы павінны завяршыцца да лета-восені 2013 года. "Пасля гэтага пачнецца будаўніцтва шахты і самога камбіната", - дадаў бізнесмен.
У сваю чаргу Міхаіл Мясніковіч адзначыў важнасць гэтага буйнога інвестпраекта для Беларусі. Ён прапанаваў разгледзець тыя работы, якія ўжо выкананы па праекту, спыніцца на пытаннях, што патрабуюць вырашэння.
"Славкалій" - даччыная структура кампаніі GMC Global Energy plc (Вялікабрытанія і Паўночная Ірландыя). Новы горна-абагачальны камбінат будзе пабудаваны на базе Нежынскага ўчастка Старобінскага радовішча калійных солей. Як паведамлялася, на першым этапе магутнасць вытворчасці плануецца на ўзроўні 1,1 млн.т калію ў год.
Пн | Аўт | Сер | Чцв | Пт | Сб | Нядз |
---|