9 снежня, Мінск /Кар. БЕЛТА/. Мінскі трактарны завод аднаўляе пастаўкі тэхнікі ў Перу, паведамілі БЕЛТА ў прэс-службе Мінпрама.
"Пастаўкі трактарнай тэхнікі ў Перу ажыццяўляліся МТЗ у часы СССР. Цяпер Мінскі трактарны завод вяртаецца на гэты рынак", - адзначылі ў Мінпраме.
Прадстаўнікі новага афіцыйнага дылера ААТ "МТЗ" у Перу Orbes Agricola S.A.C. 21 лістапада 2014 года атрымалі тры трактары "Беларус". "Прадстаўнікі Мінскага трактарнага завода спадзяюцца, што гэта пастаўка стане пачаткам доўгага плённага ўзаемавыгаднага супрацоўніцтва", - падкрэслілі спецыялісты прэс-службы.
Афіцыйны дылер беларускага вытворцы ў 2015 годзе будзе тытульным спонсарам буйнейшай сельскагаспадарчай выстаўкі TechAgro-2015, якая праходзіць у Перу. ААТ "МТЗ" сумесна з фірмай Orbes Agricola S.A.C. плануе прыняць удзел у гэтым форуме з цэлай гамай трактароў, што выпускаюцца прадпрыемствам.
Мінскі трактарны завод заснаваны ў 1946 годзе. Уваходзіць у сістэму прадпрыемстваў Міністэрства прамысловасці. Выпускае больш як 60 мадэлей і мадыфікацый трактароў і машын у больш як 100 выкананнях і камплектацыях для ўсіх кліматычных і эксплуатацыйных умоў. На працягу некалькіх гадоў завод захоўвае за сабой долю 8-10 працэнтаў сусветнага рынку колавых трактароў. Мінскі трактарны завод вядзе актыўную дзейнасць на рынках больш як 60 дзяржаў і мае зборачныя вытворчасці ў Расіі, Азербайджане, Украіне, Казахстане, Кітаі, Румыніі, Егіпце, Сербіі, Алжыры, Венесуэле і іншых краінах. У складзе ВА "МТЗ" 11 прадпрыемстваў.
Пн | Аўт | Сер | Чцв | Пт | Сб | Нядз |
---|