Бізнес-навіны

Мінэнерга Беларусі падпісала з турэцкай кампаніяй інвестдагаворы больш як на $300 млн.

31 ліпеня, Мінск /Кар. БЕЛТА/. Мінэнерга Беларусі 30 ліпеня падпісала з турэцкай кампаніяй Cet Insaat Muhendislik Ticaret Limited Sirketi інвестдагаворы на будаўніцтва Бешанковіцкай і Верхнядзвінскай гідраэлектрастанцый. Агульны аб'ём інвестыцый складзе больш як $300 млн., паведамляе карэспандэнт БЕЛТА.

З беларускага боку дагаворы падпісаў міністр энергетыкі Аляксандр Азярэц, з турэцкай - генеральны дырэктар кампаніі Эрхан Аўдынер.

Узвесці гідраэлектрастанцыі плануецца за 3 гады. Турэцкая кампанія будзе працаваць па схеме ВОТ (Build - Operate - Transfer). Гэта шырока ўжываемы ў сусветнай практыцы інструмент дзяржаўна-прыватнага партнёрства, які будзе ўкаранёны на практыцы ў Беларусі. Інвестар за свой кошт пабудуе гідраэлектрастанцыі, а затым будзе іх эксплуатаваць на працягу 30 гадоў, пасля чаго перадасць бязвыплатна ва ўласнасць дзяржавы. Пры гэтым на этапе эксплуатацыі ён будзе прадаваць выпрацоўваемую электраэнергію беларускаму боку на выгадных для Беларусі ўмовах - прыкладна 6 цэнтаў ЗША за 1 кВт.гадз.

Падпісанне інвестыцыйных дагавораў з турэцкай кампаніяй можа паслужыць адназначным інфармацыйным сігналам для замежных інвестараў аб гатоўнасці Беларусі прымяняць прагрэсіўныя схемы дзяржаўна-прыватнага партнёрства і працаваць на гібкіх умовах, упэўнены ў Міністэрстве энергетыкі. "Гэта папулярная ў свеце і выгадная для нас схема інвесціравання", - адзначыў Аляксандр Азярэц. Ён дадаў, што міністэрства мае намер і ў далейшым працаваць у гэтым напрамку. Праз 30 гадоў ГЭС будуць перададзены ва ўласнасць Беларусі. Улічваючы, што тэрмін эксплуатацыі тэхналагічнага абсталявання станцый 60 гадоў, а плаціны - 100 гадоў, а таксама кошт, па якому інвестар будзе прадаваць электраэнергію беларускаму боку, гэтыя праекты з'яўляюцца выгаднымі для рэспублікі з эканамічнага пункту гледжання. Міністр энергетыкі дадаў, што падысці да падпісання інвестыцыйных дагавораў дала магчымасць плённая праца двух бакоў, а таксама прынятыя ў рэспубліцы заканадаўчыя акты, якія стварылі спрыяльны інвестыцыйны клімат.

Эрхан Аўдынер у сваю чаргу адзначыў, што яго як інвестара ў Беларусі прыцягвае гарантыя вяртання укладзеных сродкаў, а таксама перспектывы развіцця рэспублікі. У Стамбуле даволі  шмат аб'ектаў, пабудаваных па схеме ВОТ, гэта распаўсюджаная практыка. У планах у Эрхана Аўдынера яшчэ некалькі інвестпраектаў у Беларусі, у тым ліку ў сферы энергетыкі.

версія для друку

зрабіць стартавай

дабавіць у выбранае