16 студзеня, Мінск /Кар. БЕЛТА/. Дырэктар Сусветнага банка па Беларусі, Малдове і Украіне Чымяа Фан знаходзіцца ў Мінску з афіцыйным візітам, паведамілі БЕЛТА ў Сусветным банку.
Плануецца, што Чымяа Фан правядзе сустрэчы з прэм'ер-міністрам Беларусі Міхаілам Мясніковічам, прадстаўнікамі ўрада і Нацыянальнага банка для абмеркавання першых вынікаў рэалізацыі стратэгіі партнёрства Групы Сусветнага банка для Беларусі на 2014-2017 гады і каардынаванага падыходу да яе рэалізацыі.
"Сустрэчы з прадстаўнікамі грамадзянскай супольнасці і акадэмічных колаў будуць прысвечаны абмеркаванню магчымасцей удзелу грамадскіх арганізацый і насельніцтва ў праграмах, якія падтрымліваюцца Групай Сусветнага банка ў Беларусі", - гаворыцца ў паведамленні Сусветнага банка.
На гэты момант інвестыцыйны партфель Сусветнага банка ў Беларусі ўключае чатыры праекты на суму $467,5 млн. З таго часу як рэспубліка стала членам Сусветнага банка ў 1992 годзе, СБ прадаставіў краіне крэдытныя рэсурсы на суму $955 млн. Акрамя таго, грантавае фінансаванне ў аб'ёме $23,7 млн было прадастаўлена на рэалізацыю амаль 30 праграм, уключаючы праграмы з удзелам арганізацый грамадзянскай супольнасці.
Пн | Аўт | Сер | Чцв | Пт | Сб | Нядз |
---|