26 снежня, Мінск /Юлія Огнева - БЕЛТА/. Гібрыдны аўтобус плануецца стварыць у Беларусі да канца наступнага года, паведаміў сёння журналістам намеснік прэм'ер-міністра Беларусі Уладзімір Сямашка пасля пробнага выезду ў горад першага электробуса "Белкамунмаш", перадае карэспандэнт БЕЛТА.
"У нашых планах - доследна-канструктарская распрацоўка гібрыднага аўтобуса да канца наступнага года. Гэта від транспарту, які злучае і аўтобус, і тралейбус. У яго ўбудаваны накапляльнік, які вырашае праблему эканоміі энергіі пры тармажэнні, пры руху з пакату. Ён дазваляе без падзарадкі рухацца на сотні кіламетраў", - адзначыў Уладзімір Сямашка.
Сёння ў Мінску адбыўся пробны выезд у горад першага электробуса "Белкамунмаш". Запас яго ходу складае 12 км. Зарадка будзе ажыццяўляцца на канцавых прыпынках на працягу 5-7 хвілін. Таксама магчыма хуткая зарадка на звычайных прыпынках. Пасажыраўмяшчальнасць электробуса - 153 чалавекі, месц для сядзення - 38. Тэхніка абсталявана сістэмамі відэаназірання, у салоне ёсць разеткі для падзарадкі тэлефонаў, ноўтбукаў і іншых дэвайсаў.