Бізнес-навіны

4 красавіка, Брэст /Святлана Вячорка - БЕЛТА/. Брэсцкі завод "Цветатрон" у 2014 годзе павялічыць пастаўкі для абароннай прамысловасці Расіі больш як у 2 разы, паведаміў карэспандэнту БЕЛТА дырэктар завода Аляксандр Стрыбук.

Ваенная прадукцыя ў свой час складала аснову вытворчасці завода, адзначыў Аляксандр Стрыбук. Пасля канверсіі пачатку 90-х гадоў яе выпуск быў згорнуты і адноўлены толькі праз дзесяцігоддзе. Прадугледжваецца, што ў перспектыве доля камплектуючых вырабаў для электронных сістэм ВПК складзе не менш як чвэрць агульнага аб'ёму вытворчасці.

Ёсць што прапанаваць і прадстаўнікам самай мірнай прафесіі - хлебаробам. Бартавыя інфармацыйна-кіруючыя сістэмы для збожжаўборачных машын, распрацаваныя тут яшчэ чвэрць стагоддзя таму, удасканалілі. Цяпер яны сталі ўніверсальнымі і могуць у залежнасці ад праграмы прымяняцца на любой тэхніцы. У 2013 годзе прыборамі брэсцкага завода былі ўкамплектаваны амаль 80 працэнтаў камбайнаў "Гомсельмаша". Цяпер, паводле слоў дырэктара, вядуцца перагаворы аб магчымасці паставак новых электронных блокаў на завод "Растсельмаш".

Завод "Цветатрон" быў створаны ў 1983 годзе як буйны вытворца радыёэлектронных кампанентаў і спецтэхналагічнага абсталявання для патрэб радыёэлектроннай прамысловасці, а таксама тавараў народнага спажывання. Аснову вытворчай дзейнасці завода складае выпуск паўправадніковых вырабаў (дыёды, стабілітроны), вытворчасць друкарскіх плат, вырабы электроннай тэхнікі. Прадукцыя прадпрыемства выкарыстоўваецца практычна ва ўсіх галінах народнай гаспадаркі: вылічальнай тэхніцы, сістэмах інфарматыкі, тэле- і радыёсувязі, фотатэхніцы, аўтамабільнай электроніцы. Раней прадпрыемства ўваходзіла ў склад навукова-вытворчага аб'яднання "Інтэграл" (Мінск).