Бізнес-навіны

18 красавіка, Клайпеда /Ганна Кот - БЕЛТА/. ААТ "Беларуськалій" набыло 30 працэнтаў клайпедскага тэрмінала за $30 млн. Аб гэтым паведаміў сёння журналістам прэм'ер-міністр Беларусі Міхаіл Мясніковіч, перадае карэспандэнт БЕЛТА.

"Беларуськалій" фактычна купіў 30 працэнтаў тэрмінала сухіх насыпных грузаў. Гэта вельмі вялікі тэрмінал. Я лічу, што гэтыя інвестыцыі ў памеры $30 млн. - добрыя інвестыцыі", - сказаў Міхаіл Мясніковіч. Такім чынам, пакет акцый тэрмінала ў памеры 30 працэнтаў належыць ААТ "Беларуськалій", растлумачыў ён. Беларусь інвесціруе ў эканоміку Літвы.

У мінулым годзе беларускія інвестыцыі ў Літву перавысілі 70 млн. еўра. "У гэтым годзе мы ўжо інвесціравалі ў Клайпедскі порт $30 млн. Гэта першыя беларускія інвестыцыі ў порт. Цяпер ідзе прапрацоўка, каб яшчэ купіць пакет акцый кампаніі для "Гродна Азота" па азотных угнаеннях. Такім чынам, гэта даволі добры інвестыцыйны партфель", - адзначыў прэм'ер-міністр.

Як транзітная краіна Беларусь рэалізуе даволі амбіцыйную праграму па гандлёва-лагістычных цэнтрах, звярнуў увагу ён. Упраўленне таварнымі патокамі дасць магчымасць сканцэнтраваць грузы, у тым ліку ў Клайпедзе. "У першую чаргу, гэта магчыма дзякуючы геаграфічным умовам і зладжанай рабоце нашых чыгуначнікаў", - адзначыў Міхаіл Мясніковіч. Цяпер кожная трэцяя тона ў Клайпедзе - беларускія грузы. Пры гэтым ёсць значны патэнцыял для павелічэння гэтай лічбы, упэўнены беларускі прэм'ер.