24 ліпеня, Мінск /Святлана Саўко - БЕЛТА/. ААТ "ААБ Беларусбанк" упершыню ўвайшло ў топ-400 буйнейшых банкаў свету, паведамілі БЕЛТА ў банку.
Вядомае міжнароднае выданне аб банкаўскай індустрыі і фінансавых рынках The Banker апублікавала штогадовы рэйтынг "1000 буйнейшых банкаў свету". Беларусбанк палепшыў сваю пазіцыю, узняўшыся з 412-га месца на 399-е, і па-ранейшаму застаецца адзіным беларускім банкам у верхняй палавіне рэйтынгу. Акрамя таго, Беларусбанк заняў 14-е месца сярод 25 буйнейшых банкаў Цэнтральнай і Усходняй Еўропы па памеры капіталу першага ўзроўню.
Па выніках агляду за 2013 год Беларусбанк прызнаны банкам нумар 1 у Беларусі па памеры капіталу першага ўзроўню (уключае аплачаны акцыянерны капітал, рэзервовы і іншыя фонды банка, непасрэдны прыбытак мінулых гадоў і справаздачнага года).
Беларусбанк - буйнейшая ўніверсальная фінансава-крэдытная ўстанова краіны, якая прапануе кліентам звыш 100 відаў банкаўскіх паслуг і прадуктаў. З'яўляецца галаўной арганізацыяй банкаўскага холдынга. Доля Рэспублікі Беларусь у статутным фондзе банка складае амаль 98 працэнтаў. Беларусбанк з'яўляецца лідарам сярод беларускіх банкаў па аб'ёме капіталу і статутнага фонду, сукупных актывах, філіяльнай сетцы, аб'ёмах крэдытавання кліентаў, масавых плацяжах, міжнародным бізнесе.
Пн | Аўт | Сер | Чцв | Пт | Сб | Нядз |
---|