14 кастрычніка, Мінск /Юлія Дылянок - БЕЛТА/. Беларусь прапануе Свярдлоўскай вобласці паставіць аўтобусы МАЗ да чэмпіянату свету па футболе-2018. Аб гэтым заявіў сёння першы намеснік прэм'ер-міністра Беларусі Уладзімір Сямашка на першым пасяджэнні Савета дзелавога супрацоўніцтва Беларусі і Свярдлоўскай вобласці, перадае карэспандэнт БЕЛТА.
"Мы прапануем разгледзець магчымасць пастаўкі нашых аўтобусаў да важнай спартыўнай падзеі - чэмпіянату свету па футболе-2018. Прычым прапануем паставіць не толькі традыцыйную пасажырскую тэхніку, але і аўтобусы з газаматорнымі рухавікамі", - адзначыў Уладзімір Сямашка.
У сваю чаргу намеснік міністра прамысловасці Беларусі Аляксандр Агароднікаў нагадаў, што аўтобусы МАЗ актыўна выкарыстоўваліся на Алімпійскіх гульнях у Сочы. "Наша тэхніка добра сябе зарэкамендавала. Мы ўпэўнены, што нашы аўтобусы з поспехам маглі б выкарыстоўвацца і ў час правядзення чэмпіянату свету па футболе-2018", - сказаў Аляксандр Агароднікаў.
Гаворачы аб супрацоўніцтве прадпрыемстваў прамысловага комплексу Беларусі і Свярдлоўскай вобласці, Аляксандр Агароднікаў падкрэсліў, што назіраецца пераход ад камерцыйных кантрактаў да арганізацыі і рэалізацыі сумесных праектаў. "Кожны бок разумее, які прадукт ён хоча вырабляць і якога партнёра хоча мець, каб выраблены прадукт быў лепшым у сваім класе", - упэўнены намеснік міністра.
У прыклад ён прывёў падпісанае пагадненне паміж ААТ "БелАЗ" - кіруючая кампанія холдынга "БелАЗ-Холдынг" і ААТ "Сінара - Транспартныя Машыны" аб арганізацыі дзейнасці па прымяненні рухавікоў серыі ДМ-185 у кар'ерных самазвалах БелАЗ. "Ужо да канца 2015 года мы павінны правесці апрабацыю гэтай мадэлі рухавіка на рэальным працуючым БелАЗе. Мы павінны атрымаць прадукт, які будзе з поспехам выкарыстоўвацца двума бакамі", - канстатаваў Аляксандр Агароднікаў.
Пн | Аўт | Сер | Чцв | Пт | Сб | Нядз |
---|