Бізнес-навіны

15 кастрычніка, Мінск /Аліна Грышкевіч - БЕЛТА/. Беларусь мае намер аднавіць у Эфіопіі зборачную вытворчасць беларускіх трактароў і іншай сельгастэхнікі. Такая дамоўленасць дасягнута на беларуска-эфіопскіх кансультацыях паміж міністэрствамі замежных спраў на ўзроўні намеснікаў міністраў замежных спраў, паведамілі БЕЛТА ў прэс-службе МЗС Беларусі.

Бакі разгледзелі магчымасці прымянення беларускага вопыту і ноу-хау пры рэалізацыі перспектыўных праектаў у сельскагаспадарчым сектары, перспектывы ўдзелу беларускіх прадпрыемстваў у рэалізацыі інфраструктурных праектаў у Эфіопіі. Намеснікі міністраў, прааналізаваўшы бягучы стан дагаворна-прававой базы беларуска-эфіопскага супрацоўніцтва, абмеркавалі неабходныя першачарговыя крокі па яе пашырэнні, у тым ліку па падрыхтоўцы да падпісання пагадненняў аб гандлёвым супрацоўніцтве, узаемнай абароне інвестыцый, паскарэнні падрыхтоўкі пагаднення аб супрацоўніцтве ў сферы адукацыі.

Дасягнута дамоўленасць актывізаваць узаемадзеянне ў ААН і іншых міжнародных арганізацыях (Савет ААН па правах чалавека, ЭКАСАС, Рух недалучэння), узаемную падтрымку ініцыятыў Беларусі і Эфіопіі і іх кандыдатур у гэтых арганізацыях. Знешнепалітычныя ведамствы будуць садзейнічаць актывізацыі беларуска-эфіопскіх кантактаў у галіне адукацыі і навукі.

У час візіту на базе Гандлёвай палаты Эфіопіі быў праведзены бізнес-форум прадстаўнікоў беларускіх і эфіопскіх дзелавых колаў. З эфіопскага боку ў мерапрыемстве прынялі ўдзел каля 60 эфіопскіх бізнесменаў, зацікаўленых у развіцці дзелавога супрацоўніцтва з Беларуссю. Пасольства Беларусі ў Эфіопіі на форуме правяло прэзентацыю эканамічнага і экспартнага патэнцыялу Беларусі, магчымасцей і перспектыў гандлёва-эканамічнага супрацоўніцтва з Беларуссю. Па выніках мерапрыемства быў падпісаны пратакол аб супрацоўніцтве паміж БелГПП і Гандлёвай палатай Эфіопіі.

У склад беларускай дэлегацыі, якая знаходзіцца ў Эфіопіі, уваходзяць прадстаўнікі Міністэрства прамысловасці, МАЗа, МТЗ, іншых беларускіх прадпрыемстваў і арганізацый.