Бізнес-навіны

Беларусь і Венесуэла вызначаюць схему стварэння СП па вытворчасці газавага абсталявання

29 снежня, Мінск /Ганна Кот - БЕЛТА/. Беларусь і Венесуэла рыхтуюцца да перагавораў аб стварэнні сумеснага прадпрыемства па вытворчасці газавага абсталявання для пераводу аўтатранспарту на выкарыстанне газу, а таксама газавага абсталявання для газіфікацыі домаўладанняў. Аб гэтым паведамілі карэспандэнту БЕЛТА ў дзяржаўным вытворчым аб'яднанні па паліву і газіфікацыі "Белпалівагаз".

"Венесуэльскаму боку накіраваны запыт адносна канкрэтнай наменклатуры прадукцыі, вытворчасць якой павінна забяспечыць прадпрыемствы, плануемай схемы яго стварэння і магчымага функцыянавання", - удакладнілі ў аб'яднанні.

 У "Белпалівагаз" таксама праінфармавалі аб двухбаковых праектах, якія ўжо рэалізуюцца ў Венесуэле. Так, сёння прадпрыемства з сумесным капіталам Venezuelagazstroi S.A. ажыццяўляе газіфікацыю жылога фонду раёна Парокія Сукрэ. Сіламі прадпрыемства ў 2012-2013 гадах плануецца газіфікаваць жылыя дамы каля 13 тыс. сем'яў. Прапрацоўваецца пытанне ўдзелу Venezuelagazstroi S.A. у праектаванні і будаўніцтве, пачынаючы з 2012 года, газаправода Баркісімета-Барынас працягласцю 232 км.

Адзін з перспектыўных напрамкаў супрацоўніцтва дзвюх дзяржаў - арганізацыя забеспячэння насельніцтва ў Венесуэле звадкаваным газам у балонах. "Беларускі бок прапануе ў якасці пілотнага праекта наладкаваць у адным з населеных пунктаў Венесуэлы колькасцю 10-30 тыс. чалавек бесперабойнае якаснае забеспячэнне звадкаваным газам у балонах па заяўках насельніцтва", - растлумачылі ў  ДВА "Белпалівагаз". Там удакладнілі, што на папярэднім этапе неабходна, каб венесуэльскія спецыялісты прыехалі ў Беларусь і азнаёміліся з дзеючай тут сістэмай забеспячэння звадкаваным балонным газам для далейшага ўкаранення аналагічнай схемы ў Венесуэле.

Цяпер у Венесуэле забеспячэнне звадкаваным газам у балонах ажыццяўляюць мноства прыватных структур, адсутнічае дакладная каардынацыя работы па дастаўцы газу насельніцтву, пастаўка ажыццяўляецца нерытмічна, а цана звадкаванага газу ў балонах, што рэалізуецца насельніцтву, вышэйшая, чым у Беларусі, якая выпрацоўвае яго з імпартуемай нафтавай сыравіны, растлумачылі ў ДВА "Белпалівагаз".

 Падведамныя арганізацыі ДВА "Белпалівагаз" забяспечылі ў бягучым годзе безаварыйнае і бесперабойнае забеспячэнне спажыўцоў Беларусі газападобнымі і цвёрдымі відамі топліва. Паводле папярэдняй ацэнкі, за студзень-лістапад 2011 года паказчык па энергазберажэнню ў цэлым па падведамных арганізацыях аб'яднання склаўся на ўзроўні мінус 4 працэнты пры аналагічным заданні на справаздачны перыяд. Тэмп росту аб'ёму інвестыцый у супастаўных умовах за студзень-лістапад гэтага года склаў 97,5 працэнта пры заданні 70 працэнтаў. Удзельная вага затрат на набыццё машын, абсталявання, транспартных сродкаў у агульным аб'ёме інвестыцый у асноўны капітал за адзінаццаць месяцаў склаўся на ўзроўні 24,6 працэнта пры заданні на год 21,7 працэнта. За студзень-лістапад гэтага года сальда знешняга гандлю таварамі прагназуецца дадатным на ўзроўні $90,3 млн. пры заданні на справаздачны перыяд $78,9 млн. Сальда знешняга гандлю паслугамі за адзінаццаць месяцаў гэтага года чакаецца дадатным на ўзроўні $5,3 млн. пры заданні на справаздачны перыяд $3,5 млн. "Па выніках работы за 2011 год прагназуецца выкананне ўсіх даведзеных паказчыкаў сацыяльна-эканамічнага развіцця", - адзначылі ў ДВА "Белпалівагаз".

Дзяржаўнае вытворчае аб'яднанне "Белпалівагаз" вядзе сваю гісторыю з 1958 года. Аб'яднанне мае развітую сетку газазабеспячальных, торфаздабыўных і торфаперапрацоўчых прадпрыемстваў, праектных, навукова-даследчых і будаўнічых арганізацый, прадпрыемстваў і цэхаў па вытворчасці газавага абсталявання, сродкаў механізацыі і аўтаматызацыі вытворчых працэсаў, неабходнага тэхналагічнага абсталявання і запасных частак да іх. У складзе ДВА "Белпалівагаз" сфарміраваліся чатыры вытворчыя комплексы: газавы, здабычы і перапрацоўкі торфу, будаўнічы, навучнага і тэхнічнага забеспячэння. Функцыянуюць прадпрыемствы і арганізацыі з агульнай колькасцю персаналу больш як 30 тыс. чалавек.

версія для друку

зрабіць стартавай

дабавіць у выбранае