7 ліпеня, Масква /Эдуард Півавар - БЕЛТА/. Беларусь і Цвярская вобласць Расіі заключаць пагадненне аб шматпланавым супрацоўніцтве. Аб гэтым БЕЛТА паведамілі ў прэс-службе пасольства Беларусі ў РФ па выніках праведзеных сёння ў Цверы перагавораў Надзвычайнага і Паўнамоцнага Пасла Беларусі ў Расіі Ігара Петрышэнкі з губернатарам Цвярской вобласці Андрэем Шавялёвым.
"У ходзе сустрэчы бакі дасягнулі дамоўленасцей аб стварэнні сумеснай рабочай групы па развіцці супрацоўніцтва. У прыватнасці, рабочай групе будзе даручана падрыхтоўка пагаднення паміж урадам Беларусі і ўрадам Цвярской вобласці аб гандлёва-эканамічным, навукова-тэхнічным і культурным супрацоўніцтве, распрацоўка дарожнай карты супрацоўніцтва Беларусі і Цвярской вобласці на бліжэйшыя два гады", - адзначылі ў пасольстве.
Удзельнікі перагавораў прадметна абмеркавалі перспектывы развіцця супрацоўніцтва ў розных сферах. Ігар Петрышэнка падкрэсліў, што ёсць вялізны рэзерв па нарошчванні аб'ёму двухбаковага ўзаемадзеяння рэспублікі і рэгіёна.
Андрэй Шавялёў заявіў, што ў час рэалізацыі доўгатэрміновай мэтавай дзяржаўнай праграмы па развіцці сельскай гаспадаркі і рэгуляванні рынкаў сельскагаспадарчай прадукцыі, сыравіны і прадуктаў харчавання на 2013-2020 гады расійскі бок разгледзіць магчымасць закупкі беларускай сельскагаспадарчай тэхнікі. Ігар Петрышэнка пацвердзіў гатоўнасць суб'ектаў гаспадарання Беларусі пастаўляць тэхніку з выкарыстаннем схем міжнароднага лізінгу і льготнага крэдытавання, а таксама забяспечыць яе якаснае сэрвіснае і гарантыйнае абслугоўванне.
Бакамі таксама дасягнута дамоўленасць аб правядзенні ў 2014-2015 гадах на тэрыторыі рэгіёна прэзентацый новых узораў сельскагаспадарчай, дарожна-будаўнічай, камунальнай, грузавой тэхнікі, вырабленай у Беларусі.
Вызначаны пункты магчымага ўзаемадзеяння па пытанні ўдзелу беларускага боку ў рэалізуемых у Цвярской вобласці праектах па будаўніцтве жывёлагадоўчых ферм, свінакомплексаў, малочнатаварных ферм.
Удзельнікі сустрэчы дамовіліся актывізаваць супрацоўніцтва беларускіх і цвярскіх навукова-даследчых інстытутаў па абмене вопытам, перш за ўсё ў сферы льнаводства. Значны інтарэс у расійскага боку выклікала прапанова па магчымым удзеле беларускіх арганізацый і прадпрыемстваў у аднаўленні тарфяной галіны Цвярской вобласці.
Ігар Петрышэнка прыбыў у Цвярскую вобласць на чале дэлегацыі дзелавых колаў, у склад якой увайшлі кіраўнікі і прадстаўнікі ААТ "МТЗ", ААТ "МАЗ", ТАА "Амкадор-Цэнтр", ЗАТ "Мяса-малочная кампанія", ААТ "Быхаўскі кансервава-агароднінасушыльны завод", ТАА "Дзяметра", ААТ "Зялёнаборскае". Яны наведалі Цвярскі абласны бізнес-інкубатар, дзе правялі перагаворы аб устанаўленні партнёрскіх адносін з прадстаўнікамі выканаўчых органаў дзяржаўнай улады рэгіёна, прадпрыемстваў і арганізацый Цвярской вобласці. Тут жа паслом была паказана прэзентацыя экспартных і інвестыцыйных магчымасцей для дзелавых колаў рэгіёна.
У час візіту запланаваны таксама сустрэча з кіраўніком горада Цвер Аляксандрам Корзіным, наведванне Цвярскога вагонабудаўнічага завода і ААТ "Цвераграснабкамплект".
У 2013 годзе тавараабарот паміж Беларуссю і Цвярской вобласцю склаў $287,5 млн. і павялічыўся ў параўнанні з 2012 годам на 20,8 працэнта. Беларускі экспарт дасягнуў $125,7 млн. (рост на 21,9 працэнта), імпарт - $161,8 млн. (19,9 працэнта). На рынку Цвярской вобласці запатрабаваны беларускія прадукты харчавання, будаўнічыя матэрыялы, прадукцыя нафтахіміі, мэбля. Беларусь закупляе ў Цвярской вобласці металапрадукцыю, папяровую і шкляную прадукцыю
Пн | Аўт | Сер | Чцв | Пт | Сб | Нядз |
---|