4 лістапада, Магілёў /Сяргей Кулягін - БЕЛТА/. Беларусі і Літве трэба ствараць буйныя транспартна-лагістычныя кампаніі і цэнтры. З такой ініцыятывай выступіў на Х Беларуска-літоўскім эканамічным форуме ў Магілёве прэм'ер-міністр Міхаіл Мясніковіч, перадае карэспандэнт БЕЛТА.
На думку прэм'ер-міністра, транспартна-лагістычную сістэму Беларусі і Літвы трэба пашыраць, каб стварыць сумеснымі намаганнямі лагістычную сетку. Гэта можна ажыццявіць, змяніўшы грузапатокі і іншыя спадарожныя паслугі, каб развіваць усходні напрамак з выхадам на рынкі Кітая, Манголіі, а таксама краін Цэнтральнай Азіі.
"Лічу, што нам трэба пераходзіць ад малога прыгранічнага руху да стварэння буйных транспартна-лагістычных кампаній і цэнтраў. Мы маем дадатную дынаміку па загрузцы Клайпедскага порта, дзе "Беларуськалій" купіў пакет акцый аднаго з аператараў тэрмінала, нядрэнна працуем па перавозцы грузаў чыгункай, а вось па аўтамабільным транспарце трэба актывізаваць работу і ствараць адпаведную інфраструктуру", - лічыць прэм'ер.
Садзейнічаць гэтай рабоце будзе і Еўразійскі эканамічны саюз, які сапраўды ўстараняе бар'еры для развіцця міждзяржаўных гаспадарчых сувязей, свабоднага руху тавараў, капіталаў і рабочай сілы. І гэта будзе значна садзейнічаць у тым ліку прысутнасці літоўскага бізнесу ў сумесных кампаніях з беларускім капіталам. Таму пытанні транзітных магчымасцей - шырокая тэма для дыскусіі міністраў транспарту з улікам таго, што гэты рынак даволі дынамічна развіваецца.
"Ёсць актуальныя, ёсць перспектыўныя пытанні, і мы разлічваем, што яны будуць вырашаны і будуць садзейнічаць значнаму павышэнню эфектыўнасці работы ў гэтым напрамку", - сказаў Міхаіл Мясніковіч.
Пн | Аўт | Сер | Чцв | Пт | Сб | Нядз |
---|