Прамовы і інтэрв’ю

22 сакавіка, Мінск /Кар. БЕЛТА/. Беларусь дастойна падрыхтуецца да правядзення Еўрагульняў-2019. Аб гэтым заявіў прэм'ер-міністр Андрэй Кабякоў журналістам па выніках наведвання спартыўных аб'ектаў Мінска, якія будуць задзейнічаны пры правядзенні Еўрапейскіх гульняў у 2019 годзе ў Беларусі, перадае карэспандэнт БЕЛТА.

"Падрыхтоўка да Еўрагульняў ідзе нармальна, без аўралаў. Нейкай звышнагрузкі на фінансавую сістэму краіны няма, спартыўныя аб'екты мы планавалі дабудаваць незалежна ад таго, ці будуць Еўрагульні праводзіцца ў Беларусі. Але так удала склалася, што тэрміны ўводу гэтых аб'ектаў супадаюць з тэрмінамі падрыхтоўкі да гэтага спартыўнага мерапрыемства. Лічу, што ў нас ёсць усе магчымасці, каб падрыхтавацца да правядзення Еўрапейскіх гульняў належным чынам", - адзначыў прэм'ер-міністр.

Андрэй Кабякоў азнаёміўся сёння з ходам будаўніцтва і рэканструкцыі некалькіх спартыўных аб'ектаў Мінска. Прэм'ер-міністр наведаў спартыўна-стралковы комплекс імя маршала С.К.Цімашэнкі ў ваенным гарадку Уручча, дзе быў разгледжаны ход яго рэканструкцыі. "Аб'ёмы фінансавання вызначаны, падрадная арганізацыя ведае, чым займацца, людзі для выканання работ ёсць. Думаю, што ёсць перспектыва завяршыць работы ва ўстаноўлены тэрмін (да канца 2018 года) і з належнай якасцю", - лічыць кіраўнік урада.

Прэм'ер-міністр таксама пабываў на будаўнічай пляцоўцы Цэнтра алімпійскай падрыхтоўкі па мастацкай гімнастыцы на праспекце Пераможцаў. "Лічу, што гэты цэнтр будзе адным з прыгажэйшых збудаванняў у Мінску і сапраўды добрым комплексам для падрыхтоўкі нашых гімнастак. Прэзідэнт вызначыў тэрмінам уводу аб'екта снежань 2017 года, у прынцыпе, для гэтага ёсць усё неабходнае. Пытанне з некаторым недахопам фінансавых рэсурсаў мы ў бліжэйшы час вырашым, і аб'ект ва ўстаноўлены тэрмін будзе ўведзены", - адзначыў прэм'ер.

Андрэй Кабякоў ацаніў і ход рэканструкцыі стадыёна "Дынама", дзе пройдзе цырымонія адкрыцця Еўрагульняў-2019. "Гэта будзе самы галоўны аб'ект Еўрапейскіх гульняў, дзе адбудзецца адкрыццё гульняў. Работы тут вядуцца па графіку. Нейкіх ускладненняў, якія маглі б паўплываць на якасць і тэрміны выканання работ, мы на гэты час не бачым", - сказаў ён, дадаўшы, што бягучыя праблемы, што ўзнікаюць на любым аб'екце, аператыўна вырашаюцца.

Беларусь атрымала права правядзення II Еўрапейскіх гульняў у 2019 годзе на 45-м пасяджэнні Генеральнай асамблеі Еўрапейскіх алімпійскіх камітэтаў, якое ў кастрычніку 2016-га адбылося ў Мінску. I Еўрапейскія гульні прайшлі 12-28 чэрвеня 2015 года ў сталіцы Азербайджана Баку. Беларускія атлеты заваявалі на гэтым спартыўным форуме 43 медалі: 10 залатых, 11 сярэбраных і 22 бронзавыя. У медальным заліку зборная Беларусі заняла 7-е месца.