Падзеі, факты, анонсы

У рамках маючага адбыцца збору беларуская дружына правядзе сем спарынгаў перад дамашнім чэмпіянатам свету 2014 года. Шэсць таварыскіх матчаў адбудуцца ў красавіку ў рамках Еўрапейскага хакейнага выкліку і адзін - у маі супраць зборнай Даніі.

На гэты момант галоўны трэнер зборнай Беларусі Глен Хэнлан выклікаў на збор 9 хакеістаў з клубаў КХЛ і экстралігі чэмпіянату Беларусі. Сярод іх варатар Віталь Коваль ("Тарпеда", Ніжні Ноўгарад, КХЛ); абаронцы Андрэй Антонаў ("Аўтамабіліст", Екацярынбург, КХЛ), Уладзімір Дзянісаў ("Тарпеда", Ніжні Ноўгарад, КХЛ); форварды Аляксей Угараў ("Адмірал", Уладзівасток, КХЛ), Андрэй Сцяпанаў ("Амур", Хабараўск, КХЛ), Сяргей Дзямагін ("Аўтамабіліст", Екацярынбург, КХЛ), Канстанцін Кальцоў ("Атлант", Мыцішчы, КХЛ), Андрэй Касціцын ("Трактар", Чэлябінск, КХЛ), Антон Елісеенка ("Металург", Жлобін). Поўны спіс ігракоў будзе сфарміраваны пасля заканчэння выступлення каманд у плэй-оф чэмпіянатаў.

Поўны расклад бліжэйшых таварыскіх гульняў нацыянальнай зборнай Беларусі такі:

9, 11 красавіка. Нарвегія - Беларусь (2 гульні ў гасцях);

17, 18 красавіка. Беларусь - Швейцарыя (2 гульні дома);

24, 26 красавіка. Данія - Беларусь (2 гульні ў гасцях);

3 мая. Беларусь - Данія (дома).