20 снежня, Гродна /Таццяна Вішнеўская - БЕЛТА/. Віфліемскі агонь міру прыбудзе сёння ў Гродна. Аб гэтым карэспандэнту БЕЛТА паведамілі ў курыі Гродзенскай каталіцкай епархіі.
Агонь, запалены ад Незгасальнай лампады ў базіліцы Ражджаства Хрыстовага ў Віфліеме, прыбудзе сёння да беларуска-польскай граніцы, адкуль прадстаўнікі беларускіх маладзёжных арганізацый даставяць яго ў галоўны каталіцкі храм абласнога цэнтра - касцёл імя св.Францішка Ксаверыя. Вечарам у кафедральным касцёле пачнецца ўрачыстасць сустрэчы агню і святая імша.
Віфліемскі агонь запаляць каля галоўнага алтара гродзенскага храма. Пасля богаслужэння і да Ражджаства кожны вернік зможа прынесці часцінку святога агню ў свой дом. Гэта традыцыя стала папулярнай сярод гродзенцаў, паколькі Віфліемскі агонь прыязджае ў Беларусь ужо больш як 10 гадоў.
Сёння ж ад Віфліемскага агню гродзенская каталіцкая моладзь запаліць новыя лампады і адвязе іх ва ўсе прыходы епархіі. Акрамя таго, расійскія скаўты даставяць сімвалічны агонь Ражджаства ў Расію.
Як растлумачылі ў епархіі, Віфліемскі агонь мае сімвалічнае значэнне, гэта своеасаблівы вобраз гарачай веры і хрысціянскай любові, цяпла Ражджаства.
Традыцыю прывозіць агонь з Віфліема ў Еўропу пачала ў 1988 годзе аўстрыйская тэлекампанія ORF з горада Лінц. Першапачаткова акцыя мела дабрачынны характар і была накіравана на ўвагу да дзяцей-інвалідаў, хворых, выхаванцаў дзіцячых дамоў. Акцыя атрымала шырокае распаўсюджванне дзякуючы скаўтам. З Віфліема ў Вену агонь прыбывае самалётам у спецыяльным кантэйнеры, а пасля ўжо па "скаўцкай эстафеце" агонь дастаўляюць у іншыя краіны, у тым ліку Беларусь, Украіну, Расію.
Пн | Аўт | Сер | Чцв | Пт | Сб | Нядз |
---|