Падзеі, факты, анонсы

Гэты дакумент быў перададзены ад Папы Францыска беларусцы Ядвізе Пастэрнак, якая жыве ў вёсцы Муляры Вілейскага раёна. Ён датаваны 11 кастрычніка 2013 года і ўяўляе сабой падзяку за служэнне Касцёлу.

Як растлумачылі ў РКЦ, Ядвіга была дзявятым дзіцем у сям'і, нарадзілася ў той жа вёсцы, дзе і жыве цяпер. У гады ганенняў гэта жанчына, у прыватнасці, захоўвала крыж ад капліцы, якая была разабрана савецкімі ўладамі ў 1960-я гады. Акрамя таго, Ядвіга Пастэрнак арганізавала вакол сябе людзей, дзякуючы чаму можна было праводзіць богаслужэнні перад вялікімі святамі. "Пачынаючы з 1949 года, Ядвіга разам з іншымі прыхаджанамі хадзіла на пахаванні, спявала малітвы, перад пахаваннем акрапляла магілу асвячонай вадой. Гэта ў той час было адзінай магчымай формай хрысціянскага пахавання", - растлумачылі ў РКЦ. Таксама дадалі, што жанчына малілася за католікоў і праваслаўных.

Дакумент быў перададзены Ядвізе Пастэрнак ва ўрачыстай абстаноўцы Апостальскім нунцыем у Беларусі (паслом Ватыкана) архібіскупам Клаўдыа Гуджэроці.

Як паведамлялася, раней архібіскуп Клаўдыа Гуджэроці ўжо заяўляў публічна, што Папа Рымскі Францыск перадаў пергамент са сваім благаславеннем жыхарцы Беларусі. Аднак да апошняга часу нунцый трымаў у сакрэце імя жанчыны.