Падзеі, факты, анонсы

5 чэрвеня, Мінск /Валерыя Аксакава - БЕЛТА/. 4 чэрвеня ў Рэспубліканскай мастацкай галерэі Беларускага саюза мастакоў (у Палацы мастацтваў) адкрылася персанальная выстаўка жывапісу Васіля Касцючэнкі, перадае карэспандэнт БЕЛТА.

Мастак прадставіў палотны апошніх гадоў, якія аб'яднаны канцэпцыяй звароту да вобраза чалавека ў сучасным свеце. Адсюль і назва праекта - "Зямляне". Героі большасці твораў - сімвалічныя фігуры, пазбаўленыя "партрэтнасці" - летуценнікі з вялікімі дзіцячымі вачыма. Аўтар шукае вобраз сучасніка - чалавека, які, нягледзячы на ўсе тэхнічныя дасягненні, прагматыку і імклівы рытм існавання, знаходзіць у жыцці месца для пачуццяў і веры, мар і кахання. Поспех мастака Касцючэнкі - у тым, што ён здолеў праявіць сябе як сучасны аўтар, які актыўна рэагуе на падзеі і трэнды мастацкага дыскурсу і разам з тым застаецца сентыментальным, лірычным, а падчас і глыбока інтымным творцам.

Асобную старонку ў творчасці аўтара займаюць палотны на хрысціянскія сюжэты: "Прычасце", "Радаўніца", "Сустрэча". Яны нагадваюць кранальныя шэдэўры народнага іканапісу.

"Я вельмі рады, што столькі людзей прыйшло, я не чакаў, вельмі прыемна. Хачу падзякаваць вам усім, што прыйшлі на выстаўку, што падтрымалі мяне", - павітаў усіх на адкрыцці Васіль Касцючэнка.

Васіль Касцючэнка (нарадзіўся ў 1953 годзе) - вядомы беларускі мастак, педагог, член Беларускага саюза мастакоў і Міжнароднай гільдыі жывапісцаў, міжнароднага аб'яднання "Сонечны квадрат" (Масква), мастацкага аб'яднання "Арцель" (Мінск), лаўрэат спецыяльнай прэміі Прэзідэнта Рэспублікі Беларусь (2007).