Падзеі, факты, анонсы

12 верасня, Вільнюс /Аліна Грышкевіч - БЕЛТА/. Свята беларускай песні ў Шаўляі прадоўжыць Дні культуры Беларусі ў Літве. Аб гэтым карэспандэнту БЕЛТА паведаміў міністр культуры Барыс Святлоў.

У ім прымуць удзел як аматарскія ансамблі беларускай дыяспары з розных рэгіёнаў Літвы, так і прафесійныя калектывы з Беларусі. Перад святам адбудзецца ўрачыстае адкрыццё мемарыяльнай дошкі першаму кіраўніку Аб'яднання беларускіх грамадскіх арганізацый Літвы Леаніду Мурашку, які стаяў ля вытокаў правядзення гэтага мерапрыемства.

З 20 па 26 кастрычніка ў Літве запланаваны гастрольны тур Дзяржаўнага ансамбля танца Беларусі пад кіраўніцтвам Валянціна Дудкевіча. Канцэрты пройдуць у Вільнюсе, Клайпедзе, Марыямпалі, Ёнаве, Шаўляі, Алітусе. Плануюцца таксама выступленні салістаў Беларускага дзяржаўнага музычнага тэатра ў кастрычніку-лістападзе ў Каўнасе і Клайпедзе. Калектыў Беларускай дзяржаўнай філармоніі "Класік-Авангард" выступіць у горадзе Плунгэ на IX Міжнародным фестывалі імя Міхала Клеафаса Агінскага.

Дні культуры Беларусі адкрыліся ў Вільнюсе 11 верасня. Яны пачаліся з прэзентацыі беларускай выстаўкі мастакоў Парыжскай школы. Яна прадстаўляе 69 жывапісных, графічных і скульптурных работ такіх сусветна вядомых майстроў, як Марк Шагал, Хаім Суцін, Пінхус Крэмень, Міхаіл Кікаін, Восіп Любіч, Восіп Цадкін і іншых. Арганізатары выстаўкі - Белгазпрамбанк, Нацыянальны мастацкі музей Беларусі, Мастацкі музей Літвы, пасольства Беларусі ў Літве і Літвы ў Беларусі.

Прадоўжацца мерапрыемствы дзён культуры па лістапад.