Падзеі, факты, анонсы

30 сакавіка, Мінск /Кар. БЕЛТА/. 18-ы міжнародны вясенні кірмаш турысцкіх паслуг "Адпачынак-2015" пройдзе 8-11 красавіка ў Мінску ў НВЦ "БелЭкспа" (вул.Я.Купалы, 27), паведамілі карэспандэнту БЕЛТА арганізатары мерапрыемства.

Наведвальнікам прапануюць бізнес-туры, сезонны і дзіцячы адпачынак, круізы, адукацыйныя туры, экскурсійныя праграмы. Для турыстаў, якія аформяць пуцёўку непасрэдна на выстаўцы, туркампаніі зробяць скідку. Акрамя рознапланавых тураў, тэматыка кірмашу "Адпачынак-2015" будзе ўключаць транспартныя паслугі, спартыўны інвентар, страхаванне ў турызме, санаторыі, пансіянаты, дамы адпачынку, турыстычныя клубы, паслугі гасцінічнага сэрвісу, тавары для адпачынку і спорту, а таксама карты, буклеты, даведнікі і інш.

Удзел у выстаўцы пацвердзілі больш за 200 кампаній з Беларусі, Латвіі, Літвы, Польшчы, Расіі, Славакіі, Чэхіі, Грузіі, Балгарыі, Узбекістана, Ізраіля, Турцыі, Вялікабрытаніі, Венгрыі, Грэцыі. Сярод экспанентаў - тураператары, агенцтва па развіцці турызму, інфацэнтры, прадстаўнікі гасцінічнага бізнесу, нацпарку, транспартныя і страхавыя кампаніі.

У праграме выстаўцы таксама прэзентацыі новых турыстычных напрамкаў, круглыя сталы дэпартамента па турызме Мінспорту і турызму і Нацагентства па турызме, семінары па актуальных праблемах турыстычнай галіны.

Выстаўка "Адпачынак-2015" праводзіцца Нацыянальным выставачным цэнтрам "БелЭкспа" сумесна з Міністэрствам спорту і турызму.