Падзеі, факты, анонсы

15 лютага, Віцебск /Алёна Ціханава - БЕЛТА/. Першыя білеты на праграмы XXVI Міжнароднага фестывалю мастацтваў "Славянскі базар у Віцебску" ў Летнім амфітэатры паступяць у продаж з 17 лютага. Аб гэтым паведаміў журналістам дырэктар форуму Аляксандр Сідарэнка, перадае карэспандэнт БЕЛТА.

Рэалізацыя білетаў на фестывальныя праекты будзе праходзіць у тры этапы. З 17 лютага стартуе першы этап продажаў. "З пятніцы мы пачнём прадаваць білеты ў касах горада Віцебска. Мы верныя нашаму гледачу, таму што разумеем - жыхары нашай вобласці і горада Віцебска складаюць ільвіную долю гледачоў на любым фестывальным праекце. Хоць трэба адзначыць, што статыстыка апошніх гадоў сведчыць аб росце продажаў у іншых рэгіёнах краіны і за мяжой", - сказаў Аляксандр Сідарэнка.

На першым этапе рэалізацыі можна будзе набыць білеты на канцэрты адкрыцця і закрыцця, два дні фіналу Міжнароднага конкурсу выканаўцаў эстраднай песні "Віцебск", сольныя канцэрты Рыгора Лепса, Стаса Міхайлава, Валерыя Меладзэ, Ягора Крыда, груп "Рукі ўверх", "Сплін", сатырычнае шоу "Аднойчы ў Расіі". З 20 лютага білеты на гэтыя 11 праграм можна будзе набыць не толькі ў касах Віцебска, але і праз білетных аператараў ва ўсім свеце.

Другі этап продажу білетаў стартуе 17 сакавіка. З гэтага дня можна будзе набыць білет на ўсе праграмы, якія пройдуць у Летнім амфітэатры (пакуль у фестывальнай афішы іх 17). У трэці этап уключаны праекты на іншых пляцоўках форуму. Дату пачатку фінальнага этапу продажаў арганізатары паведамяць дадаткова.

Папярэдняя праграма канцэртаў "Славянскага базару" ў Летнім амфітэатры ўжо размешчана на афіцыйным сайце форуму. XXVI Міжнародны фестываль мастацтваў "Славянскі базар у Віцебску" пройдзе з 13 па 17 ліпеня (дадатковыя мерапрыемствы адбудуцца 11-12 і 18-19 ліпеня).