29 студзеня, Парыж /Аліна Грышкевіч - БЕЛТА/. Магчымасць прэзентацыі эканамічнага і інвестыцыйнага патэнцыялу Беларусі ў Парыжы абмеркаваў 28 студзеня Надзвычайны і Паўнамоцны Пасол нашай краіны ў Францыі Павел Латушка з кіраўніцтвам буйнейшага аб'яднання кіраўнікоў французскіх прадпрыемстваў MEDEF International. Аб гэтым БЕЛТА паведамілі ў пасольстве Беларусі ў Францыі.
Кіраўнік беларускай дыпламатычнай місіі разглядаў гэтыя пытанні з генеральным дырэктарам міжнароднай дырэкцыі MEDEF International Цьеры Куртэнем і яго намеснікам Жэральдзінай Ламбле-Паўлоў.
Абмяркоўваўся цяперашні стан беларуска-французскага гандлёва-эканамічнага і інвестыцыйнага супрацоўніцтва, намечаны перспектывы яго паляпшэння. Бакі разгледзелі магчымасці рэалізацыі шэрага канкрэтных сумесных праектаў, дамовіліся аб садзейнічанні з боку MEDEF International аб наладжванні кантактаў з рэгіёнамі Францыі.
Важным вынікам сустрэчы стала дамоўленасць аб правядзенні ў канцы мая - пачатку ліпеня ў Парыжы пад эгідай MEDEF International прэзентацыі эканамічнага і інвестыцыйнага патэнцыялу Беларусі з удзелам зацікаўленых беларускіх прадпрыемстваў і арганізацый, сустрэч з французскімі кампаніямі - патэнцыяльнымі партнёрамі беларускіх прадпрыемстваў.
Больш дэталёва пытанні арганізацыі прэзентацыі плануецца абмеркаваць на наступнай сустрэчы з кіраўніцтвам MEDEF International у лютым.
Пн | Аўт | Сер | Чцв | Пт | Сб | Нядз |
---|