Падзеі, факты, анонсы

Пачэснымі гасцямі "Лістапада-2012" стануць французская актрыса і нямецкі рэжысёр

17 кастрычніка, Мінск /Кар. БЕЛТА/. Пачэснымі гасцямі "Лістапада-2012" стануць французская актрыса Андрэа Ферэоль і нямецкі рэжысёр Ганс Вайнгартнер. Аб гэтым 17 кастрычніка ў час online канферэнцыі на сайце БЕЛТА паведаміў дырэктар праграмы ігравога кіно кінафестывалю "Лістапад" Ігар Сукманаў.

"У ходзе нашых фестывальных тыдняў да нас прыедуць дзве вельмі буйныя еўрапейскія асобы. У нас у гасцях будзе французская зорка, актрыса Андрэа Ферэоль, якая вядома аматарам кіно па такіх буйных еўрапейскіх кінапраектах, як "Вялікая жратва" рэжысёра Марка Ферэры, "Апошняе метро" Франсуа Труфо, "Бляшаны барабан" Фолькера Шлёндарфа. Андрэа Ферэоль адна са знакавых актрыс французскага і еўрапейскага экрана", - сказаў Ігар Сукманаў.

У Мінску французская актрыса прэзентуе карціну "Роспач" нямецкага рэжысёра Райнера Вернера Фасбіндэра ў рамках спецыяльнай рэтраспектывы нямецкага кіно "Вачамі Германіі". "Гэта для нас сапраўды вялікая і важная падзея, таму што "Роспач" - фільм класічны, які выйшаў у 1978 годзе і атрымаў другое жыццё ў мінулым - ён быў адрэстаўрыраваны і ў новым колеры і якасці выйшаў на сусветныя экраны", - адзначыў Ігар Сукманаў.

Таксама ў рамках рэтраспектывы "Вачамі Германіі" ў фестывалі прыме ўдзел адзін з буйнейшых рэжысёраў сучаснай Германіі Ганс Вайнгартнер, чые карціны дэманстраваліся на розных міжнародных кінафестывалях. Так, праект "Сытыя часы мінулі" некалькі гадоў таму з трыумфам быў паказаны на Канскім кінафестывалі. У Мінску Ганс Вайнгартнер пакажа сваю карціну "Сума ўсіх маіх частак".

Ігар Сукманаў адзначыў, што "запрасіць такіх славутых людзей вельмі і вельмі няпростая задача". "Я разлічваю на тое, што наша беларуская публіка адгукнецца на такую ініцыятыву і, самае галоўнае, зможа далучыцца да таго еўрапейскага кантэксту кіно, якому пакланяецца мільённая армія кінаманаў", - падкрэсліў ён.

Імёны астатніх зорак, якія прымуць удзел у Мінскім міжнародным кінафестывалі "Лiстапад-2012", арганізатары фестывалю пакуль вырашылі пакінуць у тайне.

версія для друку

зрабіць стартавай

дабавіць у выбранае