Афіцыйны сайт Рэспублікі Беларусь
Навіны
Каляндар падзей у Беларусі
Выдатныя мясціны Беларусі
Сусветная спадчына ЮНЕСКА ў Беларусі
Беларускія санаторыі і курорты
Сувеніры з Беларусі
| Галоўная | Навіны | Падзеі, факты, анонсы

Падзеі, факты, анонсы

17 Mar 2015

Міжнародны конкурс маладых піяністаў з нагоды 100-годдзя з дня нараджэння Рыхтэра адкрываецца ў Брэсце

17 сакавіка, Брэст /Святлана Вячорка - БЕЛТА/. Першы міжнародны конкурс піяністаў, прысвечаны 100-годдзю з дня нараджэння Святаслава Рыхтэра, пройдзе 17-19 сакавіка ў Брэсцкім дзяржаўным музычным каледжы імя Рыгора Шырмы, перадае карэспандэнт БЕЛТА.

У музычных спаборніцтвах, арганізаваных грамадскім аб'яднаннем "Брэсцкае абласное музычнае таварыства", прымуць удзел 18 маладых піяністаў з Беларусі, Мексікі і Кітая. Конкурс пройдзе ў дзвюх узроставых катэгорыях - ад 16 да 18 гадоў і ад 19 да 22 гадоў. Журы, у склад якога ўвойдуць вядомыя прафесары музыкі з Літвы і Польшчы, узначаліць дацэнт Беларускай дзяржаўнай акадэміі музыкі (БДАМ) Уладзімір Дулаў.

Канкурсантам неабходна будзе сыграць праграму з некалькіх музычных твораў працягласцю да 25 мінут. Поліфанічны стыль прагучыць у французскіх і англійскіх сюітах і партытах Баха, санатная форма - у творах венскіх класікаў Гайдна, Моцарта, Бетховена, рамантыка - у вольным творы або віртуозным эцюдзе. Пераможцы конкурсу атрымаюць прэміі, заснаваныя праўленнем абласнога музычнага таварыства. Плануецца, што конкурс будзе праводзіцца раз у два гады.

"На жаль, такіх піяністычных конкурсаў для дзяцей, якія займаюцца музыкай з чатырох-пяці гадоў, мала праводзіцца ў нашай краіне. Таму мы адразу адгукнуліся на запрашэнне. Калі конкурс стане традыцыйным, мы будзем з задавальненнем на яго прыязджаць і ўдзельнічаць, удасканальваць свой прафесійны ўзровень. Таму што любы конкурс - гэта перш за ўсё не столькі спаборніцтва, колькі набыццё новага вопыту. Гэта больш каштоўна, чым атрыманне дыплома", - падзялілася меркаваннем маці канкурсанткі, студэнткі другога курса Рэспубліканскага музычнага каледжа пры БДАМ Алена Макарава.

Акрамя конкурсных праслухоўванняў, арганізатары паклапаціліся і аб культурнай праграме для ўдзельнікаў: іх чакае наведванне мемарыяльнага комплексу "Брэсцкая крэпасць-герой" і музея гісторыі Брэста, экскурсія па горадзе. Як адзначыла старшыня абласнога музычнага таварыства заслужаны дзеяч мастацтваў Лілія Батырава, конкурс маладых піяністаў стане пралогам грандыёзнага музычнага свята, прысвечанага стогадоваму юбілею выдатнага піяніста XX стагоддзя Святаслава Рыхтэра. 20 сакавіка ў Брэсцкім акадэмічным тэатры драмы адбудзецца гала-канцэрт у яго гонар, у якім прымуць удзел вядомыя музыканты з Беларусі і Расіі.

Архіў
Пн Аўт Сер Чцв Пт Сб Нядз
Помнікі Вялікай Айчыннай вайны ў Беларусі