Падзеі, факты, анонсы

13 мая, Мінск /Кар. БЕЛТА/. Беларускія музеі актыўна ўдзельнічаюць у акцыі "Ноч музеяў", якая мае міжнародны фармат. Аб гэтым паведаміла на прэс-канферэнцыі намеснік начальніка ўпраўлення ўстаноў культуры і народнай творчасці Міністэрства культуры Валянціна Макарава, перадае карэспандэнт БЕЛТА.

У гэтым годзе як рэспубліканскія, так і рэгіянальныя музеі падрыхтавалі цікавыя праграмы для сваіх наведвальнікаў, якія прыйдуць у ноч з 16 на 17 мая. Такая акцыя дае магчымасць прыцягнуць увагу большай колькасці наведвальнікаў, прадставіць свае экспазіцыі і праграмы большай колькасці гледачоў. У сістэме Міністэрства культуры Беларусі працуюць 152 музеі.

Расказваючы аб праекце, які стане адметнасцю "Ночы музеяў", дырэктар Дзяржаўнага літаратурнага музея Янкі Купалы Алена Ляшковіч адзначыла, што гэта будзе карнавальнае шэсце. Дзейства музейнай ночы пад дэвізам "Вакол свету за адну ноч" разгорнецца таксама і на тэрыторыі парку Янкі Купалы. Арганізатары плануюць азнаёміць гасцей з песеннай і танцавальнай культурай 15 краін, з якімі звязана імя народнага паэта. "Карнавальнае шэсце краін дасць магчымасць зазірнуць не толькі да бліжэйшых суседзяў - у Расію, Літву, Польшчу, Украіну, але і ў Бразілію, Кітай. У Амерыцы ўстаноўлены помнік Янку Купалу, а ў Бразіліі ёсць публічная бібліятэка, якой прысвоена імя Купалы, у Пекіне быў першы міжнародны праект беларускага музея", - сказала Алена Ляшковіч.

Дырэктар Дзяржаўнага літаратурна-мемарыяльнага музея Якуба Коласа Зінаіда Камароўская запрасіла гасцей на праграму "Святло ў акне", якая названа так, паколькі народны пясняр Якуб Колас працаваў начамі. У праграме "Ночы музеяў" - пленэр, касцюміраваная экскурсія, майстар-клас па напісанні карцін у незвычайнай тэхніцы. На працягу адной гадзіны з 19.00 да 20.00 у гасцей будзе магчымасць запісаць сваё жаданне за сталом Якуба Коласа яго пяром.

Зінаіда Камароўская дадала, што да канца года музей прапануе новую цікавую экспазіцыю ў гаражах, якая раскажа аб усіх аўтамабілях, якімі карыстаўся паэт, аб паездках, якія ён ажыццяўляў.