Падзеі, факты, анонсы

15 верасня, Масква /Эдуард Півавар - БЕЛТА/. Карціны Зураба Цэрэтэлі і ўборы ад Валянціна Юдашкіна і Вячаслава Зайцава аб'яднаў міжнародны этнакультурны фестываль "Этна Арт Фэст 2017", які адкрыўся вечарам 14 верасня ў Дзелавым і культурным комплексе пасольства Беларусі ў Расіі, паведамляе карэспандэнт БЕЛТА.

Вітаючы гасцей, сярод якіх былі прадстаўнікі Выканкама СНД, Маскоўскага дома нацыянальнасцей, Федэральнага агенцтва Рассупрацоўніцтва, Міністэрства культуры Расіі, пасольстваў краін - удзельніц СНД у РФ, дыяспар краін Садружнасці, саветнік-пасланнік пасольства Беларусі ў Расіі Юрый Ярашэвіч канстатаваў, што беларускі Дзелавы і культурны комплекс стаў прыкметнай культурнай пляцоўкай расійскай сталіцы, а мерапрыемствы, праводзімыя тут, здольны прыцягнуць увагу яркіх прадстаўнікоў творчай інтэлігенцыі. Ён выказаў упэўненасць, што прадстаўленыя на фестывалі творы жывапісу, скульптуры, прадметы дэкаратыўна-прыкладнога мастацтва, а таксама работы сучасных мадэльераў-дызайнераў, дадуць магчымасць навучыцца яшчэ лепш разумець адзін аднаго і бачыць прыгажосць навакольнага свету ва ўсіх яе праяўленнях.

Арганізатары фестывалю падрыхтавалі разнастайную праграму, якая пачалася з выстаўкі "Дыялог культур", прымеркаванай да 260-годдзя заснавання Расійскай акадэміі мастацтваў. У экспазіцыі прадстаўлены работы вядомых жывапісцаў, скульптараў, майстроў дэкаратыўна-прыкладнога мастацтва з Расіі, Беларусі, Азербайджана, Арменіі, Малдовы, Казахстана, Кыргызстана, Таджыкістана, Узбекістана, Украіны. У ліку ўдзельнікаў выстаўкі - Зураб Цэрэтэлі, Таір Салахаў, Барыс Месерэр і іншыя акадэмікі Расійскай акадэміі мастацтваў. Асобнае месца ў экспазіцыі занялі ўнікальныя творчыя работы і эскізы вядомых расійскіх куцюр'е Вячаслава Зайцава, Валянціна Юдашкіна і іншых мадэльераў.

Прадоўжыла фестываль дэфіле ў этнічным стылі - паказ традыцыйных народных касцюмаў і мадэлей адзення з этнакультурнымі элементамі сучасных дызайнераў. У ім прынялі ўдзел мадэльеры і дызайнеры з Расіі і краін СНД. Акрамя таго, адбылася выстаўка-кірмаш прадметаў народных рамёстваў і промыслаў, а таксама іншай этнакультурнай прадукцыі народаў краін СНД. У ёй прынялі ўдзел арганізацыі, кампаніі, індывідуальныя прадпрымальнікі і аўтары, прадукцыя якіх мае этнічныя і нацыянальна-культурныя кампаненты. Былі прадстаўлены творы майстроў народных рамёстваў, нацыянальныя касцюмы, кераміка, вырабы са скуры, металу, мастацкае ткацтва, вышыўка і карункі, ювелірнае мастацтва.

Міжнародны этнакультурны фестываль "Этна Арт Фэст" упершыню быў арганізаваны ў 2016 годзе і прысвячаўся 25-годдзю ўтварэння СНД. Асноўныя мерапрыемствы праекта праходзяць у Расіі і Вялікабрытаніі. Адметныя асаблівасці фестывалю - этнакультурная накіраванасць, шырокі геаграфічны ахоп і шматнацыянальны склад удзельнікаў. Мерапрыемствы фестывалю накіраваны на захаванне этнакультурнай разнастайнасці, папулярызацыю гісторыка-культурнай спадчыны, народных традыцый, нацыянальных рамёстваў і промыслаў, аб'ектаў ЮНЕСКА дзяржаў - удзельніц СНД.