10 снежня, Мінск /Кар. БЕЛТА/. Каляндар турыстычных падзей 2015 года рыхтуецца ў Мінску. Аб гэтым паведамілі карэспандэнту БЕЛТА ў інфармацыйна-турысцкім цэнтры "Мінск".
Каляндар, у якім будуць прадстаўлены самыя цікавыя падзеі музычнага, тэатральнага, спартыўнага жыцця сталіцы, будзе надрукаваны ў бліжэйшыя дні. Так, жыхароў і гасцей горада паклічуць на музычны праект "Мінскі джаз", масленічныя гулянні, міжнародны фестываль тэатральнага мастацтва "Панарама", канцэрты беларускіх і замежных выканаўцаў, цыркавыя шоу, выстаўкі і іншыя мерапрыемствы.
Каляндар выпусцяць на рускай і англійскай мовах. Выданне будзе распаўсюджвацца на міжнародных турыстычных выстаўках і прэзентацыях, таксама яго можна будзе бясплатна атрымаць у інфармацыйна-турысцкім цэнтры "Мінск".
Акрамя таго, інфацэнтр падрыхтаваў да зімовых свят спецыяльны буклет-даведнік па самых навагодніх месцах сталіцы. Ён раскажа, што можна купіць на калядных кірмашах, як стварыць навагодні настрой і дзе ў Мінску сустрэць Дзеда Мароза. Выданне даступна ў сталічных гасцініцах, турфірмах, Нацыянальным аэрапорце Мінск, інфацэнтры "Мінск".
Напярэдадні калядных і навагодніх свят у інфармацыйна-турысцкім цэнтры "Мінск" можна атрымаць бясплатную інфармацыйна-даведачную падтрымку на замежных мовах, інфармацыю аб аб'ектах гісторыі і культуры, спартыўных, грамадскіх, культурных падзеях Мінска, азнаёміцца з рэпертуарам тэатраў, музеяў, кінатэатраў і галерэй, атрымаць кансультацыю па падборы гіда. Тут жа турыст можа атрымаць рэкламна-інфармацыйны пакет аб Мінску - карту, буклеты, брашуры, даведнікі і набыць сувеніры. Магчыма арганізацыя экскурсій па заяўках.
Пн | Аўт | Сер | Чцв | Пт | Сб | Нядз |
---|