Падзеі, факты, анонсы

Каляндар падзей у Беларусі: cнежань 2015

 Снежань 2015

Мультымедыйная выстава "Ван Гог. Ажыўшыя палотны" ў Мінску

Арт-праект "Спадчына Беларусi ў сусветным спiсе ЮНЕСКА"

У мінскім парку імя Чалюскінцаў стартаваў праект, дзякуючы якому можна завочна азнаёміцца з выдатнымі мясцінамі Беларусі, якія ведаюць ва ўсім свеце. Маштабная фотавыстаўка пад адкрытым небам стала прадаўжэннем праекта "Спадчына Беларусі" і прысвечана юбілейным падзеям 2015 года: 70-годдзю Сусветнай арганізацыі ЮНЕСКА, 60-годдзю Беларусі ў Сусветнай арганізацыі ЮНЕСКА, 10-годдзю Нясвіжскага палацава-паркавага ансамбля ў ЮНЕСКА. Экспазіцыя, якая ўпрыгожыла агароджу парку на цэлы год, уключае больш за 60 фотаработ і дэманструе чатыры беларускія помнікі, унесеныя ў Спіс сусветнай культурнай і прыроднай спадчыны: Белавежскую пушчу, Мірскі замак, Нясвіжскі палацава-паркавы ансамбль, Дугу Струвэ.

Калі: з 22 мая
Дзе: Мінск, парк імя Чалюскінцаў

Шедэўры Траццякоўскай галерэі ў Мінску

Унікальны праект "Ад рэалізму да імпрэсіянізму" прадстаўляе Нацыянальны мастацкі музей Беларусі і Дзяржаўная Траццякоўская галерэя – адзін з самых буйных у свеце музеяў рускага выяўленчага мастацтва. Упершыню беларускія знатакі мастацтва ўбачаць больш як 70 палотнаў выдатных майстроў рускага жывапісу XIX-XX стагоддзяў, сярод якіх Аляксей Саўрасаў, Ісак Левітан, Іван Шышкін, Васіль Паленаў, Ілья Рэпін, Канстанцін Каровін… Асаблівую цікавасць уяўляюць работы знакамітых ураджэнцаў Беларусі, якія атрымалі сусветнае прызнанне дзякуючы высокай тэхніцы выканання. Сярод іх – адзін з самых вядомых імпрэсіяністаў свайго часу, майстар лірычнага пейзажу Станіслаў Жукоўскі, а таксама знакаміты вучань Івана Шышкіна і Архіпа Куінджы, пейзажыст, графік і сцэнограф Фердынанд Рушчыц.

Калі: 5 верасня – 11 снежня
Дзе: Мінск, Нацыянальны мастацкі музей Беларусі

Праграма "Афрыка!?!" у Белдзяржцырку

Цыркавая праграма "Афрыка!?!" запрашае акунуцца ў таямнічы свет "чорнага кантынента", населены цемнаскурымі туземцамі і экзатычнымі жывёламі. Гледачы здзейсняць займальнае падарожжа па бяскрайніх пустынях і сустрэнуць на сваім шляху паветраных гімнастаў, акрабатаў на мачтах, жанглёраў, акрабатаў-вальтыжораў, дрэсіроўшчыкаў з раз'юшанымі кракадзіламі і львамі, змеямі, забаўнымі малпамі, ослікамі і сабачкамі. У праграме шоу - адзіны ў свеце хор кракадзілаў-гігантаў у нумары "Егіпецкі гамбіт" Аляксандра Арлова, захапляльны атракцыён "У сузор'і льва" пад кіраўніцтвам прадстаўніцы адной са старэйшых дынастый дрэсіроўшчыкаў Вольгі Барысавай, вясёлы нумар "Эксцэнтрыка з малпай" уладальніка "Сярэбранага клоўна" і двух спецпрызоў Міжнароднага маладзёжнага фестывалю ў Монтэ-Карла "Прэм'ера рампы 1997" Айдына Ісрафілава...

Калі: 25 верасня - 16 снежня
Дзе: Мінск, Белдзяржцырк

Выстаўка "Вялікія класікі XX стагоддзя" ў Мінску

Новая галерэя "Дом карцін", якая нядаўна адкрылася ў самым цэнтры Мінска, запрашае аматараў сусветнага мастацтва на выстаўку, якая пабывала ў дзясятках гарадоў. У экспазіцыі – работы сусветна вядомых майстроў, якія зрабілі пераварот у мастацтве ХХ стагоддзя: Сальвадора Далі, Марка Шагала і Анры Матыса. Міжнародны праект раскрывае творчую манеру яркіх прадстаўнікоў асноўных плыней  мадэрнізму праз іх графічныя работы. Упершыню беларуская публіка ўбачыць такі маштабны збор з замежных прыватных калекцый – 229 графічных лістоў, створаных у 1910-70-я гады ў тэхніцы афорта і літаграфіі.

Калі: 1 кастрычніка – 31 снежня
Дзе: Мінск, галерэя "Дом карцін"
Даведацца падрабязней

Выстава "Жыццё Карэі" ў Нацыянальным мастацкім музеі

"Жыццё Карэі" – сумесны праект Музея ўніверсітэта Дангук і Нацыянальнага мастацкага музея Беларусі. Унікальная калекцыя, якая ахоплівае перыяд часу ад дзяржавы Каро (X–XIV стст.) да сучаснасці, дае магчымасць не толькі пазнаёміцца з культурай, традыцыямі і звычаямі, але і паўсядзённым жыццём карэйскага народа. У экспазіцыі прадстаўлены шэдэўры традыцыйнага свецкага і рэлігійнага жывапісу, творы дэкаратыўна-прыкладнога мастацтва, скульптура, а таксама адзенне, прадметы быту, мэбля і інтэр'еры сучаснага карэйскага дома. Выстава падзелена на тэматычныя блокі, прысвечаныя розным этапам карэйскага жыцця і связаным з імі рытуалам, сярод якіх нараджэнне дзіцяці, вяселле, святкаванне важных дат – 70, 77, 80, 88, 90 і 99-годдзяў.

Калі: 14 кастрычніка – 6 снежня
Дзе: Мінск, Нацыянальны мастацкі музей
Даведацца падрабязней

Мультымедыйная выстава "Ван Гог. Ажыўшыя палотны" ў Мінску

Незвычайная мультымедыя-экспазіцыя прысвечана 125-й гадавіне смерці аднаго з самых папулярных мастакоў свету – Вінсэнта Ван Гога. Творчая спадчына вялікага галандца налічвае звыш 2 000 твораў мастацтва, у тым ліку 930 карцін і 1 100 эскізаў і малюнкаў. Наведвальнікі выставы змогуць даведацца аб трагічным жыцці і творчасці постімпрэсіяніста, а таксама падрабязна вывучыць мастацкую манеру, апынуўшыся "ўнутры" яго карцін. Каля 400 палотнаў будуць прадстаўлены на вялікіх экранах на выставачнай плошчы больш як 1500 м² пад акампанемент класічнай музыкі. Жадаючыя змогуць выпіць кубачак кавы на "Начной тэрасе кафэ", сфатаграфавацца ў знакамітай "Спальні ў Арлі", а таксама напісаць сваю "Зорную ноч" на майстар-класе па жывапісе.

Калі: 13 лістапада – 13 снежня
Дзе: Мінск, выставачная прастора "ЦЭХ"

XІI Міжнародны фестываль студэнцкіх тэатраў "Тэатральны куфар"

Адзіны ў Беларусі міжнародны фестываль студэнцкіх тэатраў, які стаў адным з самых прэстыжных ва Усходняй Еўропе, за сваю гісторыю сабраў рэкордную колькасць удзельнікаў – 250 творчых калектываў з 60 краін. У гэтым годзе гледачы маладзёжнага форуму, які пройдзе пад дэвізам "Традыцыі. Пошук. Эксперымент", убачаць лепшыя пастаноўкі беларускіх і замежных студэнцкіх тэатраў, а таксама дэбютныя праекты маладых драматургаў з розных краін свету. Па традыцыі, галоўны прыз форуму – "Вялікі куфар" – атрымае лепшы спектакль па выніках галасавання гледачоў. У рамках праграмы таксама адбудуцца творчыя сустрэчы, дыскусіі, майстар-класы па акцёрскім майстэрстве і рэжысуры, прэзентацыі эксперыментальных п'ес тэатральнай майстэрні "КуфарДрамаЛаб".

Калі: 29 лістапада – 6 снежня
Дзе: Мінск, Беларускі дзяржаўны ўніверсітэт
Даведацца падрабязней

Glenn Miller Orchestra Europe ў Мінску

Адзін з лепшых свінгавых аркестраў свету – Glenn Miller Orchestra Europe – прадаўжае традыцыі легендарнага джаз-бэнда, заснаванага ў 1937 годзе Гленам Мілерам. Шырокую вядомасць яго калектыў атрымаў пасля выхаду на вялікі экран мюзікла "Серэнада сонечнай даліны" рэжысёра Бруса Хамберстоўна, дзе прагучалі кампазіцыі Moonlight Serenade, In the Mood, Tuxedo Junction, Chattanooga Choo Choo, I've Got a Gal in Kalamazoo… У склад знакамітага аркестра пераемнікаў пад кіраўніцтвам маэстра Віла Салдэна ўвайшлі прафесіянальныя мультыінструменталісты з усёй Заходняй Еўропы, кожны з якіх мае свой асаблівы стыль. У праграме музыкантаў у Мінску – п'есы выдатных кампазітараў эпохі біг-бэндаў, якія стваралі свае творы ў 30-50-х гадах ХХ стагоддзя. 

Калі: 1 снежня
Дзе: Мінск, Палац Рэспублікі

Група "КВАТРА" ў Мінску

Вядомая расійская група "КВАТРА" аб'ядноўвае таленавітых салістаў, выпускнікоў Акадэміі харавога мастацтва імя А.В. Свешнікава, якіх за элегантны стыль і майстэрства называюць "залатымі галасамі" Расіі. Іх тэмбры, што атрымалі параўнанне з чатырма порамі года, утвараюць поўную музычную гаму і даюць магчымасць выконваць кампазіцыі любой складанасці. За творчую кар'еру артысты выпусцілі пяць альбомаў, выступалі на сумесных канцэртах з сусветнымі зоркамі Пласіда Дамінга, Алесандра Сафіна, Дзмітрыем Хварастоўскім... У новай праграме вакальнай групы ў Мінску прагучаць савецкія шлягеры, якія ў нашы дні дзякуючы класічным аранжыроўкам і прафесійнаму выкананню набываюць новае гучанне.

Калі: 2 снежня
Дзе: Мінск, КЗ "Мінск"

Монаспектакль Алега Меньшыкава "1900" у Мінску

Таленавіты акцёр і рэжысёр, народны артыст Расіі Алег Меньшыкаў, вядомы сваімі ролямі ў фільмах "Пакроўскія вароты", "Стомленыя сонцам", "Каўказскі нявольнік", "Сібірскі цырульнік", нядаўна адзначыў 55-годдзе. У беларускай сталіцы мастацкі кіраўнік і вядучы артыст Маскоўскага драматычнага тэатра імя М. М. Ярмолавай прадставіць адну з самых запамінальных работ у сваёй творчай кар'еры – монаспектакль "1900", створаны па п'есе сучаснага італьянскага драматурга Алесандра Барыка "Novecento. Un monologo". Гэта захапляльная гісторыя аб геніяльным піянісце, які нарадзіўся на борце трансатлантычнага лайнера "Вірджынія" і, не маючы ні імя, ні дакументаў, пражыў дзіўнае жыццё, поўнае падарожжаў і сустрэч, сэнсам якога заўсёды заставалася музыка. Паводле слоў артыста, п'еса "1900" – гэта прыгожая легенда аб мастацтве, аб дружбе, аб каханні, якую яму захацелася расказаць людзям.

Калі: 3 – 4 снежня
Дзе: Мінск, Беларускі дзяржаўны музычны тэатр

Паліна Гагарына ў Мінску

У маі-2015 сваім выступленнем яна заваявала сэрцы гледачоў усёй Еўропы, заняўшы другое месца ў фінале конкурсу "Еўрабачанне", а яе сінгл А Million Voices увайшоў у топ iTunes-чартаў розных краін свету. Вядомая расійская спявачка і актрыса, пераможца тэлепраекта "Фабрыка зорак-2" і настаўніца апошняга сезона шоу "Голас", "Жанчына года" па версіі часопіса Glamour Паліна Гагарына прадаўжае здзіўляць паклоннікаў. Новае музычнае шоу "Спектакль", на падрыхтоўку якога спатрэбілася больш як 10 гадоў і больш як 100 спецыялістаў, уяўляе сабой тэатральнае дзейства са зменай касцюмаў, дэкарацый, настрою і жанру песень – ад блізкіх па духу да народных "Я твая" і "Полюшка" да сучасных "Не дарую", "Не", "Кроч". Гледачоў чакае жывы гук, светлавое шоу, відэаінсталяцыі, выдатныя танцавальныя нумары і, зразумела, абаяльная і адначасова дзёрзкая Паліна Гагарына.       

Калі: 7 снежня
Дзе: Мінск, Палац Рэспублікі

I Фестываль класічнага мастацтва "Дзяніс Мацуеў прадстаўляе…" у Мінску

Вядомы піяніст – народны артыст Расіі Дзяніс Мацуеў – сёння з'яўляецца не толькі сольным выканаўцам, удзельнікам міжнародных форумаў, партнёрам вядучых сімфанічных аркестраў, але і прэзідэнтам дабрачыннага фонду "Новыя імёны", стваральнікам музычных фестываляў для таленавітай моладзі ў розных рэгіёнах Расіі. Пасля паспяховых гастролей у мінулым годзе знакаміты віртуоз вырашыў сабраць і ў беларускай сталіцы маладых музыкантаў з усёй краіны. Адкрые мінскі фестываль гала-канцэрт, у якім Дзяніс Мацуеў выканае шэдэўры сусветнай класікі ў суправаджэнні Дзяржаўнага акадэмічнага сімфанічнага аркестра. Праграму прадоўжаць выступленні стыпендыятаў фонду "Новыя імёны", майстар-клас для студэнтаў Беларускай дзяржаўнай акадэміі музыкі, а таксама джазавы вечар ад маэстра фартэпіяннай музыкі.

Калі: 12 – 14 снежня
Дзе: Мінск, Вялікая зала Беларускай дзяржаўнай філармоніі, Палац Рэспублікі

VI Мінскі міжнародны Калядны оперны форум

Буйны оперны форум краіны зноў абяцае стаць самай запамінальнай падзеяй тэатральнага сезона і збярэ на сцэне Вялікага тэатра Беларусі зорак сусветнага опернага мастацтва. Паклоннікаў класікі чакаюць гучныя прэм'еры, музычныя вечары і лепшыя спектаклі, галоўныя партыі ў якіх выканаюць вядучыя салісты тэатраў Беларусі, Расіі, Латвіі, Балгарыі, Азербайджана, Казахстана… Па традыцыі, кульмінацыяй форуму стане Мінскі міжнародны Калядны конкурс вакалістаў, які ў мінулым годзе ўпершыню сабраў больш як 150 маладых выканаўцаў з 20 краін свету.

16 снежня – прэм'ера оперы "Царская нявеста" Мікалая Рымскага-Корсакава, Вялікі тэатр Беларусі;
17 снежня – опера "Яўген Анегін", Вялікі тэатр Расіі;
18 снежня – канцэрт маладых выканаўцаў La canzone italiana. Салісты – артыст маладзёжнай опернай праграмы Вялікага тэатра Расіі Аляксандр Рославец, лаўрэаты міжнародных конкурсаў Юрый Гарадзецкі, Марыя Шабуня, Ілья Сільчукоў;
19 снежня – опера "Кармэн" Жоржа Бізэ, дырыжор – прэзідэнт і мастацкі кіраўнік музычнага фестывалю "Лірычныя ночы ў Мармандзе" Філіп Местр (Францыя);
20 снежня – Гала-канцэрт зорак сусветнай оперы.

Калі: 16 – 20 снежня
Дзе: Мінск, Вялікі тэатр Беларусі
Даведацца падрабязней

Праграма "Вогненная каралева" ў Белдзяржцырку

Напярэдадні калядных і навагодніх свят Белдзяржцырк падрыхтаваў новую праграму для дарослых і дзяцей "Вогненная Каралева, або Новыя прыгоды Кая і Герды". Арыгінальная інтэрпрэтацыя сусветна вядомай казкі Ханса Крысціяна Андэрсена парадуе гледачоў незвычайнымі рэжысёрскімі знаходкамі і новымі героямі. Згодна з сюжэтам, Кай і Герда разам са Снягурачкай і Новым Годзікам вырашылі зрабіць дзецям навагоднія падарункі, але раптам у іх планы ўмяшалася вераломная Вогненная Каралева, якой удалося з дапамогай сваіх слуг выкрасці Новага Годзіка. Гледачам трэба будзе разам з казачнымі героямі зрабіць захапляльнае падарожжа па далёкіх краінах і сустрэць на сваім шляху забаўных малпачак, крыважэрых кракадзілаў, драпежных ільвоў…

Калі: 18 снежня – 10 студзеня
Дзе: Мінск, Белдзяржцырк

Праект TheatreHD: балет "Шчаўкунок" у Вялікім тэатры

У рамках унікальнага міжнароднага праекта TheatreHD, які аб'яднаў больш як 35 гарадоў Расіі, Украіны, Казахстана, а цяпер і Беларусі, аматары мастацтва атрымалі магчымасць убачыць на вялікім экране ў рэжыме рэальнага часу драматычныя, оперныя і балетныя пастаноўкі буйнейшых сусветных тэатраў. Мінскі тэатральны кінасезон пачаўся яшчэ ў кастрычніку паказам оперы Джузэпе Вердзі "Трубадур" у пастаноўцы Метраполітэн Опера пры ўдзеле Ганны Нятрэбка і Дзмітрыя Хварастоўскага. У гэтым месяцы прыхільнікі балетнага мастацтва ўбачаць легендарны "Шчаўкунок", пастаўлены на сцэне Вялікага тэатра ў 1968 годзе. Вядомы харэограф Юрый Грыгаровіч упершыню прыўнёс у дзіцячую казку філасофскія развагі аб недасягальнасці ідэальнага шчасця і тым самым зрабіў спектакль сусветным здабыткам ХХ стагоддзя.

Калі: 20 снежня
Дзе: Мінск, кінатэатр "Цэнтральны"

Выстаўка "Гоя… Пікаса" ў Мінску

Эксклюзіўная выстаўка арыгіналаў вялікіх мастакоў ХХ стагоддзя – Франсіска Гоя і Пабла Пікаса – сумесны праект Каралеўскай акадэміі прыгожых мастацтваў Сан-Фернанда (Мадрыд) і Нацыянальнага мастацкага музея Беларусі. Упершыню знатакі мастацтва ўбачаць у Беларусі амаль 100 графічных твораў агульным коштам 1,4 мільёна еўра. Панарама творчасці галоўнага мастака іспанскага рамантызму – Франсіска Гоя – прадстаўлена праз найбольш значныя графічныя работы з яго знакамітых серый "Капрычас", "Бедствы вайны", "Таўрамахія" і "Дыспаратэс". Са спадчыны самага "дарагога" мастака ў свеце – Пабла Пікаса – у экспазіцыю ўвайшлі гравюры "Ранены пікадор", "Акцёрская трупа", "Тры жанчыны і тарэадор", а таксама работы з серый "Сюіта Валара", ілюстрацыі да навелы Анарэ дэ Бальзака "Невядомы шэдэўр", створаныя па заказе Амбруаза Валара – аднаго з буйнейшых арт-дылераў таго часу.

Калі: 21 снежня 2015 – 21 сакавіка 2016 года
Дзе: Мінск, Нацыянальны мастацкі музей

Вялікі Маскоўскі цырк у Мінску. Шоу "Канструктар" братоў Запашных

Браты Запашныя карыстаюцца заслужанай папулярнасцю ў беларускай публікі – толькі за апошні год зорныя госці прадставілі ў Мінску свае фантастычныя шоу "Эмоцыі…", "UFO. Цырк з іншай планеты" і "К.У.К.Л.А". Новая лега-пастаноўка "Канструктар" – "гісторыя са свету цацак" – разгорнецца на буйнейшай пляцоўцы Беларусі "Мінск-Арэне". Галоўны акцэнт маляўнічага шоу зроблены на экзатычныя нумары з гепардамі пад кіраўніцтвам прадстаўніцы старадаўняй цыркавой дынастыі – дрэсіроўшчыцы Дар'і Касцюк і яе мужа Вячаслава Куркова. У праграме прымуць удзел акрабаты, паветраныя гімнасты, эквілібрысты з аднаколавымі веласіпедамі і сферамі, канатаходцы, ілюзіяністы і клоўны. Акрамя таго, у шоу гледачы ўбачаць самага хуткага драпежніка планеты гепарда, нацыянальны сімвал Аўстраліі кенгуру, а таксама героя рускіх народных казак – сапраўднага бурага мядзведзя.

Калі: 24 – 27 снежня
Дзе: Мінск-Арэна

Лядовае шоу Ільі Авербуха "Мама" ў Мінску

Вядомы фігурыст, трэнер і харэограф-пастаноўшчык, прадзюсар Ілья Авербух прадставіць у Мінску лядовае шоу "Мама", у аснове якога – любімы ўжо многімі пакаленнямі дзяцей аднайменны мюзікл, зняты ў 1976 годзе па матывах казкі "Воўк і сямёра казлянят". Галоўныя ролі ў кінастужцы выканалі выдатныя акцёры Людміла Гурчанка і Міхаіл Баярскі, а музычныя кампазіцыі ўвайшлі ў "залаты фонд" савецкага кінематографа. У навагодняй казцы на лёдзе гарманічна спалучаюцца вядомыя ўсім сюжэт і песні, а таксама паветраная акрабатыка, цыркавыя нумары, сучасныя спецэфекты і 3D-тэхналогіі, маляўнічыя дэкарацыі і касцюмы. У спектаклі задзейнічаны зоркі сусветнага фігурнага катання Таццяна Тацьмяніна, Максім Марынін, Алена Беражная, а таксама юныя артысты дзіцячага балета "Лядовая Сімфонія".

Калі: 27 снежня
Дзе: Мінск, Чыжоўка-Арэна