Падзеі, факты, анонсы

3 красавіка, Мінск /Аліна Грышкевіч - БЕЛТА/. Віяланчэльныя школы Беларусі і Францыі адзначылі 2 красавіка 20-годдзе супрацоўніцтва сумесным канцэртам у Мінску, паведамляе карэспандэнт БЕЛТА.

У Вялікай зале Белдзяржфілармоніі з аншлагам прайшоў канцэрт аркестра Рэспубліканскай гімназіі-каледжа пры Белдзяржакадэміі музыкі пад кіраўніцтвам дырыжора Уладзіміра Перліна. Салісты - Іван Карызна, Георгій Анішчанка, Міхаіл Радунскі (віяланчэль), Жэром Перно (віяланчэль) і Жэром Дзюкро (фартэпіяна). Віртуознае музычнае выкананне пакарыла беларускую публіку.

Пасольства Францыі, якое з'яўлялася арганізатарам канцэрта, напярэдадні правяло сустрэчу французскіх і беларускіх музыкантаў з журналістамі. Музыканты з цеплынёй расказалі, як пачалося і ўмацоўвалася іх сяброўства. Яго пачаткам паслужыў першы прыезд у Мінск 20 гадоў таму Жэрома Перно. Паступова, крок за крокам, складваўся творчы абмен таленавітых французскіх і беларускіх маладых музыкантаў. За гэты час многія з іх дасягнулі вялікіх поспехаў і сталі вядомымі не толькі ў сваіх краінах, але і ва ўсёй Еўропе.

Французскія віяланчэліст выкладчык Жэром Перно і піяніст кампазітар Жэром Дзюкро сталі сапраўднымі сябрамі для беларускіх калег, іх педагогаў. Напрыклад, прафесар па класу віяланчэлі, мастацкі кіраўнік і галоўны дырыжор канцэртнага аркестра Рэспубліканскага музычнага каледжа пры Беларускай акадэміі музыкі Уладзімір Перлін выказаў меркаванне, што дзякуючы гэтым творчым узаемаадносінам створаны сапраўдны музычны мост паміж Мінскам і Парыжам.

Нягледзячы на тое, што французская віяланчэльная школа з'яўляецца вядомай у свеце, вопыт супрацоўніцтва з беларускімі спецыялістамі вельмі карысны, тут вельмі шмат таленавітых музыкантаў і педагогаў, адзначыў Жэром Перно.

Надзвычайны і Паўнамоцны Пасол Францыі ў Беларусі Дзідзье Канес лічыць існуючае паміж музыкантамі дзвюх краін супрацоўніцтва ўнікальным.

Жэром Перно супрацоўнічае з многімі вядомымі сімфанічнымі французскімі аркестрамі, а таксама цесна працуе з барочным ансамблем "Матэус" і яго кіраўніком Жанам-Крыстофам Спінозі. Ён выступаў сумесна з Камерным аркестрам Еўропы, Венскім сімфанічным аркестрам, Мюнхенскім аркестрам Баварскай дзяржаўнай оперы, аркестрам Цюрыхскага опернага тэатра, Нацыянальным аркестрам Іспаніі і аркестрам радыё Стакгольма. Дзюкро і Перно разам іграюць на самых прэстыжных музычных сцэнах свету - "Вігмар-Хол" у Лондане, Тэатр Елісейскіх палёў і Тэатр Шатле ў Парыжы.