Падзеі, факты, анонсы

6 мая, Мінск /Кар. БЕЛТА/. IX Беларускі міжнародны медыяфорум пройдзе 8-12 чэрвеня, паведаміла карэспандэнту БЕЛТА першы намеснік міністра інфармацыі Лілія Ананіч.

У папярэднія гады медыяфорум праходзіў у другой палавіне мая, аднак у бягучым годзе дата яго правядзення перанесена на наступны месяц. Як растлумачыла Лілія Ананіч, гэта ў першую чаргу звязана са святкаваннем 70-годдзя вызвалення Беларусі ад нямецка-фашысцкіх захопнікаў і правядзеннем у Мінску чэмпіянату свету па хакеі.

Медыяфорум пройдзе пад дэвізам "Партнёрства ў імя будучыні: рэаліі глабальнага свету". Свой удзел у мерапрыемстве пацвердзілі ўжо 20 краін, цяпер у самым разгары падрыхтоўка да яго.

Беларускі міжнародны медыяфорум традыцыйна выступае дыскусійнай пляцоўкай для абмену думкамі і выпрацоўкі новых ідэй і канцэпцый прадстаўнікамі экспертнай і медыясупольнасці краін СНД, блізкага і далёкага замежжа. Яго арганізатарамі выступаюць Міністэрства інфармацыі Беларусі, Пастаянны камітэт Саюзнай дзяржавы, Міждзяржаўны фонд гуманітарнага супрацоўніцтва дзяржаў - удзельніц СНД, Беларускі саюз журналістаў.