25 верасня, Мінск /Аліна Грышкевіч - БЕЛТА/. Фестываль японскай культуры "Японская восень у Беларусі" адкрываецца 25 верасня мерапрыемствам у Полацку, паведамілі карэспандэнту БЕЛТА ў пасольстве Японіі ў Мінску.
Новы праект стартуе ў Полацкім краязнаўчым музеі выстаўкай "Традыцыі і культура Японіі", на цырымоніі адкрыцця з прывітальным словам выступіць часовы павераны ў справах Японіі ў Беларусі Сігехіра Міморы.
У Мінску мерапрыемствам фестывалю стане адзінаццаты рэспубліканскі конкурс на лепшае вуснае выступленне на японскай мове. Ён намечаны на 27 верасня ў БДУ. Сігехіра Міморы будзе прысутнічаць на гэтым спаборніцтве ў якасці члена журы.
У дыпламатычнай місіі адзначылі, што ў час фестывалю, які прадоўжыцца па лістапад, пройдзе шмат разнапланавых мерапрыемстваў. Яны пазнаёмяць з традыцыйнай і сучаснай японскай культурай - яе музычным, танцавальным, дэкаратыўна-прыкладным аспектамі і анімацыйным мастацтвам. Госці фестывалю змогуць наведаць выстаўкі, канцэрты, кінапаказы, а таксама лекцыі і майстар-класы японскіх спецыялістаў. У прыватнасці, адбудзецца выступленне японскага ансамбля з г.Сендай, будзе прадстаўлена выстаўка Японскага фонду "Сучасны японскі дызайн". Мерапрыемствы фестывалю адкрыты для ўсіх, хто цікавіцца культурай і традыцыямі гэтай краіны.
Правядзенне фестывалю падтрымліваецца Японскім фондам, які займаецца развіццём культурнага абмену з замежнымі краінамі і распаўсюджваннем японскай культуры за межамі Японіі.
Пн | Аўт | Сер | Чцв | Пт | Сб | Нядз |
---|