Падзеі, факты, анонсы

20 жніўня, Мінск /Кар. БЕЛТА/. Беларускі плывец Яўген Цуркін выйграў залаты медаль чэмпіянату Еўропы ў Берліне (Германія) па водных відах спорту на дыстанцыі 50 м батэрфляем, аднак не стаў адзіным пераможцам у гэтым відзе. У фінальным заплыве 19 жніўня аналагічны з Цуркіным час паказаў яго апанент з Францыі, паведамляе карэспандэнт БЕЛТА.

Яўген Цуркін і француз Фларан Манаду, які з'яўляецца алімпійскім чэмпіёнам 2012 года (на дыстанцыі 50 м вольным стылем. - Заўвага БЕЛТА), паказалі ў фінале ЧЕ-2014 19 жніўня аднолькавы час - 23,00 сек. Пасля старту вырашальнага заплыву на 50 м батэрфляем беларус некалькі адставаў ад канкурэнтаў, аднак навярстаў упушчанае на другой палавіне дыстанцыі. Сярод фіналістаў час паўфінальнага заплыву Цуркіна быў горшым (23,60 сек.), і вырашальны заплыў ён праводзіў па 8-й дарожцы.

Сярэбраны медаль на 50-метровай дыстанцыі батэрфляем не будзе ўручаны, затое на трэцюю прыступку п'едэстала, як і на першую, узняліся адразу два плыўцы - украінец Андрэй Говараў і брытанец Бенджамін Прауд (іх фінішны час - 23,21 сек.).

Яўген Цуркін заваяваў першы медаль для зборнай Беларусі на ЧЕ-2014 па водных відах спорту. У іншых фіналах 19 жніўня беларусы не выступалі.

Кантынентальнае першынство фінішуе ў сталіцы Германіі 24 жніўня.