29 снежня, Мінск /Кар. БЕЛТА/. Арцём Парахоўскі і Настасся Верамеенка прызнаны лепшымі беларускімі баскетбалістамі 2015 года. Такі вынік апытання, праведзенага газетай "Прессбол", паведамляе карэспандэнт БЕЛТА.
Цэнтравы нацыянальнай зборнай Беларусі і расійскай каманды УНІКС з Казані Арцём Парахоўскі другі год запар прызнаны лепшым сярод мужчын. Ён намнога апярэдзіў двух ветэранаў лепшага беларускага клуба "Цмокi-Мiнск" - Аляксандра Кудраўцава і Аляксея Лашкевіча.
У жанчын канкурэнцыя была больш вострай. У выніку цэнтравая зборнай Беларусі і турэцкага "Фенербахчэ" Настасся Верамеенка ўсяго на адзін бал апярэдзіла сваю калегу па амплуа Алену Леўчанка з кітайскага "Гуандуна". У тройку лепшых таксама ўвайшла Марыя Папова, якая выступае ў гэтым сезоне ў Краснаярскім "Енісеі".
Сярод трэнераў мужчынскіх каманд па-за канкурэнцыяй быў рулявы сталічных "драконаў" Ігар Грышчук, Анатоль Буяльскі восьмы раз стаў лепшым сярод настаўнікаў жаночых дружын. Пад кіраўніцтвам Ігара Грышчука "Цмокi-Мiнск" упэўнена выйгралі чэмпіянат і розыгрыш Кубка Беларусі, нядрэнна праявілі сябе ў Адзінай лізе ВТБ і Еўракубку. Анатоль Буяльскі прывёў жаночую зборную краіны да чацвёртага месца на чэмпіянаце Еўропы-2015, што дасць магчымасць ёй прадоўжыць барацьбу за пуцёўку на летнія Алімпійскія гульні-2016 у Рыа-дэ-Жанэйра.
Апытанне, у якім прынялі ўдзел амаль 70 баскетбольных спецыялістаў і спартыўных журналістаў, праводзілася ўжо 24-ы раз.