Падзеі, факты, анонсы

8 студзеня, Мінск /Кар. БЕЛТА/. Цыкл анімацыйных фільмаў "Казкі старога піяніна" сумеснай вытворчасці "Беларусьфільма" і студыі М.І.Р. (Расія) удастоены ганаровай прэміі ўрада Расіі ў галіне культуры за 2013 год. Аб гэтым БЕЛТА паведамілі на Нацыянальнай кінастудыі.

Адукацыйны анімацыйны праект расказвае аб жыццёвым шляху музыкантаў, іх імкненнях і дасягненнях. Лёсы кампазітараў прадстаўлены ў розных анімацыйных тэхніках і мастацкіх стылістыках.

Студыя анімацыйных фільмаў Нацыянальнай кінастудыі працавала над карцінамі, прысвечанымі Роберту Шуману, Іагану Баху (рэж. Алена Пяткевіч), Сяргею Пракоф'еву (рэж. Юлія Цітова), Людвігу ван Бетховену (рэж. Уладзімір Пяткевіч). У працэсе вытворчасці знаходзіцца серыя, прысвечаная Фрэдэрыку Шапэну (рэж. Ірына Кадзюкова).

У 2013 годзе анімацыйныя фільмы цыкла "Казкі старога піяніна" тройчы былі паказаны ў Італіі: на 49-м Міжнародным фестывалі новага кіно ў Пезара (чэрвень), а таксама - у Мілане (кастрычнік) і Рыме (снежань). Музей Луўр (Францыя) уключыў фільмы цыкла ў спецыяльную праграму для паказу дзіцячай аўдыторыі.