Падзеі, факты, анонсы

17 красавіка, Мінск /Кар. БЕЛТА/. Аўдыягіды на трох мовах у хуткім часе з'явяцца ў Беларускім дзяржаўным музеі Вялікай Айчыннай вайны. Аб гэтым паведаміў сёння ў час анлайн-канферэнцыі на сайце БЕЛТА дырэктар музея Мікалай Скобелеў.

"Работа па выкарыстанні аўдыягідаў завяршаецца. Мы запісваем інфармацыю на трох мовах - рускай, англійскай і нямецкай, - адзначыў Мікалай Скобелеў. - Кошт выкарыстання аўдыягідаў будзе падлічаны пасля завяршэння гэтай работы і размешчаны на інфармацыйным стэндзе ў музеі і на нашым сайце".

Дырэктар музея таксама адзначыў, што ў экспазіцыі новага будынка музея ВАВ, які адкрыўся ў ліпені 2014 года, шырока выкарыстоўваюцца сучасныя музейныя тэхналогіі - мультымедыя, 3D-анімацыя, інфакіёскі. На ўваходзе ў залу "Акупацыя" ўстаноўлены так званы туманны экран, на якім у рэжыме 3D у языках полымя з'яўляюцца назвы вёсак, што былі спалены фашыстамі.

"Новыя высокія тэхналогіі дапамагаюць больш эмацыянальна ўяўляць наведвальнікам падзеі вайны, даюць магчымасць аператыўна выкарыстоўваць эксклюзіўную музейную і архіўную гістарычную інфармацыю, звязаную з Вялікай Айчыннай і ў цэлым з Другой сусветнай вайной", - падкрэсліў Мікалай Скобелеў.

Паводле яго слоў, за дзевяць з палавінай месяцаў, што прайшлі з дня адкрыцця новага будынка музея, яго наведалі звыш 370 тыс. чалавек. "Штодзень у нас бываюць да 2 тыс. наведвальнікаў розных прафесій і ўзростаў. Шмат гасцей з краін СНД, а таксама Кітая, В'етнама, Сірыі, Ірака, Ізраіля, Латвіі і іншых дзяржаў", - адзначыў Мікалай Скобелеў.