У Ватыкане адбылася сустрэча Папы Францыска і Прэзідэнта Беларусі Аляксандра Лукашэнкі

Другі дзень візіту Прэзідэнта Беларусі на італьянскую зямлю прайшоў пад знакам Святога Прастола: 21 мая ў Ватыкане Аляксандр Лукашэнка сустрэўся з Папам Рымскім Францыскам.

Перагаворы высокага ўзроўню праходзілі ў зале Папскай бібліятэкі Апостальскага палаца, дзе па традыцыі кіраўнік каталіцкай царквы прымае сусветных лідараў і вышэйшых рэлігійных іерархаў. Аб развіцці адносін Беларусі і Рымска-каталіцкай царквы, а таксама іншых пытаннях еўрапейскай і сусветнай важнасці, справах духоўных і зямных Аляксандр Лукашэнка і пантыфік Францыск каля паўгадзіны размаўлялі ў фармаце сам-насам.

Пазней – ужо ў прысутнасці дэлегацый – беларускі Прэзідэнт і Папа Рымскі абмяняліся падарункамі. На памяць пантыфіку Аляксандр Лукашэнка падарыў копію знакамітай беларускай рэліквіі – крыжа Ефрасінні Полацкай – адноўленую з дапамогай унікальнай тэхнікі разьбы па дрэве, а таксама зробленую па гэтай тэхналогіі мадэль папскай карэты і галаграфічны абраз.

Падарункам у адказ ад Папы Францыска сталі тры напісаныя ім дакументы (аб Евангеллі, ахове прыроды, сям'і) і выява аліўкавага дрэва – сімвала міру: такім чынам пантыфік падкрэсліў мірную місію Беларусі.

Пасля размовы з Папам Рымскім Францыскам Аляксандр Лукашэнка сустрэўся з дзяржсакратаром Ватыкана П'етра Паралінам. Разам высокія госці наведалі адкрытую тут - па суседстве з Сіксцінскай капэлай – унікальную выставу беларускіх абразоў, якія ў нашай краіне аднолькава шануюцца і католікамі, і праваслаўнымі...

Адказваючы на пытанні журналістаў па выніках высокіх перагавораў, Аляксандр Лукашэнка не ўтойваў, што запрасіў Папу Францыска пабываць у Беларусі – не толькі асабіста наведаць краіну, дзе ў згодзе жывуць людзі многіх нацыянальнасцей і канфесій, але і ў знакавым месцы правесці сустрэчу з Патрыярхам праваслаўнай царквы…